مانرهم بعد /محمد رزاق الحدراوي

Mohamed16190@yahoo.com

قصيدة للشاعر محمد رزاق عبد الكاظم الحدراوي بعنوان

(ما نرهم بعد)

مانرهم بعد أتركني يله وروح
كافي سنين متحمل ملامة
وماريدن أشوفك حتى بالطيف
راح الليل أسهره وما أنامة
ماتفهم أكلك روح مليت
ولو مابيك كل ذرة كرامة
ماشيتك عمر لسبالي خوش إنسان
حسافه العمر ذاك ويا ندامة
جنت من عندي ألبسك أحلى الهدوم
وأنت الجنت تتمنه البجامة
شجنيت وياك أني غير الهموم
وعمري وياك ماظل بسلامة
صدكتك دخن وكرت كلي عليك
طلع مسموم غشيت الحمامة
من تحزن جنت تغتاض روحي عليك
وحته ويه الفرح أنفض كوامة
وذا تبجي كبل حته الدليل اينوح
وأشلع أسنوني لو جتهه أبتسامة
مريض وخنجرك سوه الظهر طعنات
وتكلي ردت أسويلك حجامة
وقشمر روحي أكلهه أيداوي الجروح
وظهري من تعب لفني بحزامة
أذا رايد تذلني هاي مصير
أنه الحدراوي من ولد النشامة
بس دور عالصلك شوف أنت منين
شخص بلا شرف شجرة عمامة
أذا للشرف منحوهه غرامات
أول ما أكصلكم غرامة
علمني أبوي الغيرة تبقة وياي
علكصتي الغيرة ناقشهه علامة
أنه شايل الغيرة عمامة فوك الراس
حتى لوطحت تبقة العمامة
وخذت منك عبر ما صاحب البذات
ولا مرة أأتمن وسمع كلامة
وخذهه كلمة مني أنتهت أني وياك
مانرهم الى يوم القيامة