يمي صورتج وتعاين أني عليج
وشمن صورتج وشبكهه لحظاني
أبوس بصورتج بلكي الجرح يرتاح
وبلكي من البجي يرتاحن أجفاني
أخلي صورتج عالكلب من أشتاك
لان من شوكي حيل عليج أذاني
صدكي صورتج ما شالهه ألبوم
محفوظة بدليلي بنبض شرياني
أفراكج صعب ماخلة جرح يطيب
نجوم الظهر من الألم راواني
جنة أطيور أحنة وبالسمة أمعلكين
كسر جنحي الزمن عالأرض ذباني
ماأملك أبد بس أنتي لي بالكون
وخذاج أنتي الوكت من بين ذرعاني
بس وداعتج ماغبتي من البال
بعد ريحة هدومج فوك قمصاني
تعبني الزمن لا مانصح وياي
وحته عليج هذا الزمن وازاني
ألج جنت أني أكولن ما أعوفج يوم
كهوه أني بمظيف وأنتي فنجاني
بس هسه أنتهينة وفترقنة هواي
وصبح واحدنة أحنة بعيد عالثاني
روحي أشتت بجفاج جنهه أتراب
وهذا الزمن قاسي بسرعة ذراني
أدمنت السهر والونه تالي الليل
وسابع جار يسمع ونت أحزاني
صدكي غيرج أنتي ماهوه الدلال
ولاغيرج أبد متكلم ألساني
صار أنتظرج أني هاي كومة سنين
مابيه أنتظر مو بهتت ألواني
دخيلج راح أموتن من الفراك
جمر فركاج وسط الكلب جواني
وحك عيناج مامر الفرح بجفاج
ولا مره ذكرني وطرق بيباني
بعد كلبج يحبني ويذكر اليفات
لو فكر بغيري وراد ينساني
أرحمي بحالي فدوه وشوفي بيه الصار
من كد البجي دم يجرن أجفاني
بهذلني الزمن خلاني جن مهظوم
أبجي عليج لو بس شخص حاجاني
كل يوم اليمر وياج أحسبه عيد
وهسه أعياد محد أجة وهناني
دفاني أنحرج ماذب عليه تراب
لكة أسمج بصدري وبجة دفاني
صح أمشي أنة صدكيني ميته الروح
بيت أشلون أصير بغير حيطاني
يسألوني البشر مالك صرت تعبان
مايدرون أنتي أجفاج سلاني
ألغيرج ماكلت لبنيه أني أهواج
أشلعه من الأصل لو كالهه ألساني
من لحظة غيابج راح من الراح
تعبني الزمن لوين وداني
مرتاحه بغيابي لو علي تبجين
مثلي أني الفراك شكثر بجاني
أنه كلبي عليج وخايف هواي
ألي يأذيج أحسن ألي أذاني
أصبرلج بعد لوطال صبري أسنين
رغم فركاج فوك الجمر مشاني
أمشي عالجمر هم أني راضي بهاذ
بس حتة الصبر من شوكي ملاني
بس خلي بخيالج أبد ما أنساج
وحبيب الروح كولي هناك يتناني
يا سباح كلبي هم هويتي الغير
لو كلبج حنون وبعدة يهواني
أحس أني غريب وجني مجنون
أدك عالراس هذا جفاج خلاني
هم فكرتي بيه وكلتي أعود بيوم
لو أني أنسيت وضاع عنواني
وحك حبي ألج بعدة الكلب يهواج
منهو الكالج غيرج أحب أني
صرت جني بسجن من رحتي عني بيوم
والزمن مني خذاج وصار سجاني
الزمن جراج مني وأني أعتن بيج
ومنج أخذ أيدي وحيل جراني
جان الكلب بيتج بس ألج مفتوح
وهسه أنهدم بيتي وطاح بنياني
هذا أخر كلام أني أحجي وياج
ألرجعتج يا حياتي بعد ماتاني
وأذا أنتي رجعتي بعالي صيحي الصوت
أنملت كافور ماتسمع أذاني
روحي أجفاج ياعيني كتلهه
ويدمعي لاتكف أبقة كتلهه
الأرض وحجامهه والله وكتلهه
بغيابج كلهن أنكلبن عليه
