ولو صار العشگ بستان

ولو صار العشگ بستان
ما بي شجره مزروعه

ولو ليل الشته الولهان
نام وزعلت شموعه

ولو ماي الغزل عطشان
ناشف ريگ ينبوعه

احس ليهسه انتي دموع
تخلق للجفن واهس

سجينه بنص هذن الضلوع
والدلال الج حارس

احسچ يا عسل موضوع
وي فلسفتي متجانس!

شريد احچيلچ عله الروح
شجره ولاغصن بيهه

حمامه ولو عجبهه تنوح
كلهه تباوع عليهه

الچ بالسر تريد تبوح
عادك لا تفشليهه

خلتلي بحبچ الاهات
واسكر من اجر حسره

الگلب لساع يدگ ما مات
وده يحضنچ بعصره

ويبيتچ مثل من يبات
شط العرب بالبصره

تمنيتچ شعر منسوب
ننشد منه ونغني

و تمنيتچ سطر مكتوب
اقراه وافهم شيعني

شفسرچ يالغز محجوب
لا فهمه وليفهمني

حرت مابين لاء واي
كل احساسي ظل مبهم

قراري بهلوضع خلي
خاف اتخذه واتندم

شظنن والحچي شتالي
والمن هلكثر مهتم ¿

واشوفچ ما رغبتي بيوم
مني حچايه حبيبه

ولا عندچ جرح ملچوم
ايدك گلتي ختطيبه

وانه اتحمل قهر وهموم
لو يوم انتي متغيبه

يصير مضيع العنوان ¿
والحب من طرف واحد¿

والاشواگ التشب نيران
تطفه بدمچ البارد¿

وانه شما اريد انقص الشوگ
يصفه لشوفتچ زايد

صفيت انه وصفاتچ بال
حيره صفنته تخضه

عليچ انرسمت الامال
تالي انمسحت بلحظه

ولاريد اشكي وضع الحال
وارضه بكل نصيب ارضه

واظل ممنون الچ للدوم
كونچ للبلابل باب

واهديلچ شكر كل يوم
وادفن بالگلب الاسباب

وصدكي بعيني لو مر نوم
اصير بحاله استغراب!

شوصف والوصف محتار
منچ يستحي ويخجل

حلاتچ دوخت الحجار
وخليتي الخمر يثمل !



م ن