هذا وَكتك بعد ما فات الأوان .....
هذا وكتك بعده ما فات الأوان ***** عيب وكتك يا عراقي يفوتك
لا تضم صوتك اذا رايد تعيش ***** منت ضل ساكت تعجل موتك
انطي صوتك للتحس يملك ضمير ***** واليتامه يرد ابوهن صوتك
صوتك يعيد الي ماتوا للحياة ***** وصوتك يبجي الي باكوا قوتك
وصوتك يرد لون ثوب المستحات ***** وانته مو يونس يرحمك حوتك
ميز اترجاك ليغرك شعار ***** هيه خامه شلون هاي تفوتك
هنّه ذنّه اجفانه ودمنه الكلام ***** وموته جملة انلمهم بتابوتك
يعني ليغرك بعد حجي الشعار ***** هنّه مو كلهن صدكَ يحجونهنْ
كالوا انضحكهن اعيون الفقير ***** بس قصدهم رادو يبجونهنْ
وكالو البيتهَ انهدم نبنيله بيت ***** بس مكَابر قصدوااليبنونهنْ
وكالو نوزع نفط بس بربعينْ ***** مو مهم ما عدكم تجدونهنْ
وكالو نردهنْ حمامات السلام ***** بس بعضهم أمرو ايشنقونهنْ
الكلام هوايْ بس خصم الكلام ***** كافي هالجذبات لا تصدكونهنْ
ولا يكلك ذني آثارالسجود ***** ثق كصصهم نصهم ايجوونهنْ
آنه اريد الكرسي يتولاه شريف ***** ما يهمني اثياب جسمه شلونهنْ
ما يهمني يجتف يسبلي ايديه ***** المهم يستر خواته ايصونهنْ
هيج خل نختار بيدينه القرار ***** لا نخلي احلامنه يهدمونهنْ
ولا نجيب الأمي ونخلي وزير ***** هالمسائل لابد تحذرونهنْ
كافي نرضى استاذ رزقه اعلى الرصيف ***** وكافي غشمه اجتوفنه ايصعدونهنْ
وكافي تنحاصص منو الاكثر يموت ***** خلي نتحاصص وردنه بلونهنْ
انته ولدك خل تشم عطر الزهور ***** وانه اوصي اولادي لا يكطعونهنْ
وانته كولالله وانه اكبر اكول ***** والبقايا اولادنه يكملونهنْ
وخل يردون الضوه لعلم العراق ***** والنجوم الطاحن ايرجعونهنْ
وهسه وضحت مسألة كطع الجفوف ***** غاية العباس لا تنسونهنْ
انه انطي جفوفي حتى انصر حسين ***** وللعراقي اصواتكم تنطونهنْ
للكاتب الرائع
ابو حسن العراقي
