الزهيري
كــل الشـرايع الـچ مـفـتوحـه يلـه اوردي
ولـو چــان ماكــفتـچ اسـگيـچ مـن اوردي
ما بيـچ بـايع وطـن .. لا بيـچ خـان اوردي
بـغداد اهلـچ زلـــم كلهم شهــامه وجــــود
علجرح دوسي إنهضي للدنيه إثبتي اوجود
منهل حضـارة يشـع .. اسمچ عله الوجـود
وجنـاس شعبچ غدت .. بسـتان من اوردي
******
نهـران دمـنه يـصـب محـد عـلينه ســال
والگاع منه ارتوت يجري ابغزاره وسال
لا ولد عــم انـتخوا ولا سيـف واحد سـال
يتفرجون اصبحوا وانباگ وسفه الوطن
وهامات ولـدك ابـد .. للاجـنبي ما وطـن
يا حيف أخذنه العصف وبليل دوه وطن
المات بينه مات ... والناجي ابقهره سال
******
إشـحده اليمـس تربتك شحـده الذي يـدنته
إدروع كــلنه الـك وحــده اصـبحـت يــدنـه
وانعيد ماضي الزمن وگفات من يدنه (جدنه)
من (بالرميثة) شـچـخ ابگلــب العـدو فاله
مگــواره مـا فـارگــه .... فال النصر فاله
بـحبــال جـدمه عـگـر .. ابـدن فلا فــالــه
حـالف يبيد العـدو ... ابروحه لون يـدنه
*****
الزمن ليــش الحرب شنهه عـليّه اوصـال
گـطع اچـبود الگـلب خلاهـه كلهه اوصـال
ما چنت اظن الغلط ... منچ يرد يا (وصال)
وانـه التسامـح الي صــاير سـمه وعـاده
ومــا حـسبـت هـــلجــره ابـداً ولا عــاده
لا منـي صــادر غــدر لا آنـه مـن عــاده
وسفه صدر من (ابن) اتمنه منه اوصال
******
أدريـه ناكـر وفـه ما يـعتـرف جـــار الـــه
امسجل مواقــف اله وآنـه الاذن جــار اله
من دون ربعي وهلي گلبي التجه وجار اله
ودخـيل عــنده طـحـت حييتـه ابــد مــــا رد
واگــــع عــليّه طـعـن إبـلـب الحـشــه مـارد
من جــور ظـلمــه احـلفـت ابـدن الـه مــارد
ولو نـدم مره ورجع .. ابفرگـه احـط جيراله
******
بـابه عـليّه اشـسـبب دون الخـلايگ وصــد
وانــه ارهيف گــلب لا زعـل احـمل وصـــــد
نيشــن ابنـص الچــبد صوب سـهامه وصــاد
مـذبــوح ارفــس صـرت بعـد الــذبـح ســـمني
الــوان مـن القـهــر .. هــم وظـلــم ســـامـني
إرحــــمني وارجـــع يـخـي وبيـا إســم سـمني
ما يفـرق إشـما صحت ... ناديني سين أوصاد
*****
شــــلال دمـعي يـصــب ابـدن فــــلا جــــــزه
وحســـبت آنــه الزعــل ابيـومه مشـه وجـزه
ســــلمت بـــيده الـچـبـد .. لـــيــش ابحقد جزه
و(سام) آنه اظنه صبح وانه اصبحت (حام) اله
تــالي طـلع مـن صخــر گـــلبـه الــذي حـامـلـه
عــاديــت كـل البــشر لاجـله وصرت حـامي اله
مــا يرضـه اله ابچبـش و(فــوگ الچبـش جـزه)
******
الي انزرع بالگــلب واحسـبته ولــف وخـل
ســـد عني كل الطـرق .. منفــذ أبـد ما خــل
هـــــم العـليّــه كـــثـر من جــور عــم وخال
مـثـل الغريـــب اصبـحــت ما بيـن اهل وجـار
حيـــث الـزمـن مــا رحـم حالي وعليّه جــــار
بـــــس بـت بالگـلـب ....والطـفل بـيده جـــار
يبـچي علـيه لوصحـت .. بيده انگطع لو خال
******
إشــعندك عـله ديـرتي رايــح عليهـه إوراد
لا تـظن عـــنـدي الــك تلگــه الجــواب اوراد
حســـبالك انســـه المضـه وانثر الدرب اوراد
عـقـدتـك يــا صـاحـبي مـا بيـهه ابـد كـل حـــل
لايـــوم عني اسئـــلـت ولا گــلت كيف الحــــال
حـچـــي الـعـواذل عـجـب بـيني وبـينـك حــــال
وفـرگــتـنـه صــارت هـدف .. للـي تـمنه إوراد
******
يســحر حــلو مبسمه تـفـاح حاوي برد
اشكثر شوك ارسلت ما منه احضه ابرد
ضلوعي ألأله حامـيه طايــح عليهه برد
ما خلـه منهن عـدل جزهن ابقسـوه وتل
ومــا ادري شـنهو بعـد يجره عليّه وتال
ظـليت اون ممتـحـن .. ذبني بأعالي التل
لا هـمته دمـعتي .. ولا گـال ياخــذ بــرد
******
العـين مـن فرگـتك دم الــدمع هـامـلــه
ظــلمك عـليّــه كـثـر زود الـهـم هم إلـه
للــي يحبـك تظـل ليــش ابقـصد هامــله
وقصــة هوانه غدت بين اللسن سـاريـه
وضــعونكم يا عـجب ويه العـدو ساريـه
ما ننتـكــس للابد نعـله ونظـل ســــاريـه
يرفع عليهه ابفخر كلمن عشگ هامه له
******
مخــدوع آنه اطلعـت واتبـع ســراب أووهم
لا خـبر منه شـــفت ابلوعــه تركــني وهـــم
مجنـون چـني صـرت يمشي اعله وجهه وهام
لا هـــدف هـوه قـصــد لا لـــــه وطـــن لا دار
افـديـــك عمري او هـلي يا بـو محـاچـي الدر
واصــبـر عـلـــه بلــوتي مـهمـا زمـــاني دار
اشمـــالك عـــليّه صـرت جـــلاد انته وهــــم
******
روحي تلوج اصبحت ما بين ارض أوسمـه
متعلـگــه اويـه النجـــم إشـــما تعـله وسـمـه
تســهر لـيالي الشـــته صار الهه عاده وسمه
والكــــم حقـد ما شـــلت گـلبي لــكم فـاتحـــــه
تنـســـه هوانه إشـــعجب تقــره عليه فاتحـــه
ما بيـن الاشـــواك ابجسمي درب اله فاتحــــه
ولمـن عـبر للعــدو .. علگ ابصـدره اوسمــه
******
مــن بين كل العطــر عطره دوه الشـام الـه
إبحسنه ابد ما شفت ابنص الصدر شامه له
ملكــته نجـد ومصــر كلـهـه وبعد شـــام اله
ولـو اگــــدر اهدي إله نبض الگلب والعـين
خـارق جمــاله وهو يشـــبه الحور العيـــن
وكــلمن سـعه إبفرگته ادعي واسب والعـن
واگوامـه الهم أشــد .. واعلن حرب شامله
******
لوعـات منّه ضگــت وگلبي اشــكثر عانه
ريــت الله لا ســـلمـه ولا وفـقــه وعانـــه
چـــان إبغلات الزلــم مـا يسـوه أبـد عانــه
اصبــح عليّه ســبع نجـم الظهـر شــافه لي
واهـم حسبته يظل لجرحي النزف شافه لي
يا حيــف بيه امنــت عضـيت أنه شــفه لي
بغـــداد لجله عفـت .. رحـت اسـكنت (عانه)
******
لجـلك إدروب الخـطر آنـه أعتني واســـلاك
واجـدامي لو گـطعــوا دونك بـنوا اســـــلاك
ما جـوز منـك ابـــد ... لا تعـتقـد واســـــلاك
من حيــث وسـط الگلب صارت يخي حنه لك
يســعر يزيد اللهـب ... واشما ســعر حن الك
دم ودموع إجمعت ... بيدي اعجنت حنه لك
هم يوم تنسه الوفه ؟.. ارد انشدك واسلاك
******
لا أوصـل لديرتـه ولا اگــرب لحدهـــم
سچاچين كلهن غدر حضّرهم وحدهـم
لمـلـم علي كــل ردي واعداي وحدهم
ســـلمته بيد الذي فوگ العـرش عَـلّـه
دومـه يظـل مبتـلي .. عِـلّه بأثـر عِلّــه
ويصير عبره ودرس بلچن عسه وعلّه
مغرور واهم يظن ... بالظلم اوحدهـــم
******
نـــــاذر اذا جـيـــــت اتـحـنـه وودي عـلـــگ
وادعي ابهجم بيت كل شامت إشموعه علگ
من حيث حبــك صبـح ابنـص دلــيلي وعلـگـ
اشـــــلون انســـه الــذي چــان لحيــاتي أمـــل
ما جـــوز منـك ابــــد ولا يـوم منــك أمــــــــــل
يلســــاكن بكــل رمـش وبگــلب (زهره وامــل)
إعــطـف علينه (ابمســـج) واذكرنه يابن علـگ*
منقول للامانة
