قصيده للشاعر عبد الحسين الحلفي

انشع حيل امن اشوفنك علي جاي
واسكر حيل اذا اشبكك اطوطح
ويصير العيد مأ اهتم لون ما جيت
وبيوم الطبك لو جيت افرح
واكول اربحت واني وياك خسران
واكول اخسرت لو وي غيرك اربح
مرجوحه الكلب ومحبتك عيد
وبما انك طفل حقك تمرجح
حلو وتلمع وتكتل اذاً انت سيف
اذاً عذرك وياك وانت تجرح
وما افكر خاف انت تذبحني
افكر خاف اتعبك وانت تذبح
اعرفنك غلط بس مستعز بيك
وكمت لخاطرك حته اكرهك صح
تسوه الدنيه عندى من اكعد وياك
وبدونك كلشي ما تسوه دينيتى
من اطب لبيتكم اشبك على الباب
ويشبكك بابنه من تطب بيتي
فرق ما بين عمري وعمرك هواي
وكمت لخاطرك اصبغ لحيتي
اتأذه اذا وي غيرك ارتاح
وحيل ارتاح اذا منك اذيتي
عليك العين تبجي ليل ونهار
واكلهه اشعطلج شو ما بجيتي
يوصي اهله بجهاله الرايد ايموت
وبس اسمك لكو اهلي بوصيتي
اعله غيرك مانحت مابيه ع النوح
وعليك شكد حلو يونسني نوحي
كظيت زيارتي بس اندعيلك
ونسيت وداعتك اندعي لروحي
جنت من روحي ضايج كبل ملكاك
وكل ساعه اكل لروحي دروحي
هسه لابعد من روحي ما اضوج
اضوج اشلون وانت الصرت روحي
سجين بحبك اني متاني الافراج
واصلي واندعي لا يجى افراجي
محتاج لحنانك حيل محتاج
ومحد غيرك يسدلي احتياجي
تجرحني بقصد وتطلع الروح
واكل للروح ما يقصد احراجي
ابو الطبع المزاجي اشكد اكرهه
واموت عليك جي طبعك مزاجي
للشاعر عبد الحسين الحلفي

الله الله
تسلم اخوي لهذا الاختيار المميز
وصح السان شاعرنا الحلفي
دوم التواصل يااارب
مع خالص التحايا وازكى الاشواق
اخوك الامير

شكرآ اخويه امير على مرورك ربي يحفضك ......حيدر الغزالي

الف شكر لك عزيزي
لجميل اختيارك
قصيدة رائعة
دام لنا ابداعك
وحسن انتقاءك
تقبل تحياتي ومروري

شكرآ اختي ام فيصل على مروركي ربي يحضك .......حيدر الغزالي

تسلم ياحيدر على نقل هذة الرائعة لزميلنا الحلفي
السلطاني

شكرآ شاعرنا المبدع كريم السلطاني ربي يحفضك ......حيدر الغزالي