ريت ماهليت يهلال الشهر
ابدن ولا لاح نورك لاظهر
*** *** ***
لاظهر نورك علينه ولاطلع
يلي خلـّـيت الجفن من دم دمع
ريت برجك غار بيك ومارجع
ريت نورك غاب عنك واندثر
*** *** ***
ريت نورك غاب عنك وانطفه
حيث بيك ايزيد مستانس صفه
نام ترس العين مسرور وغفه
ذاك جفنه الماعرف غير السهر
*** *** ***
حين هليت الحزن طر الگلب
يلي نورك چلمه معناهه الحرب
تدري ببن المصطفى ايظل عالترب
وهله بيك ايسيل دمها من النحر
*** *** ***
منها دمها ايسيل ويصير الاجل
والحرم تتيسر اخلاف الاهل
والحياة ايصيبها الذل والشلل
لو وگع عالغبره ابن فارس مضر
*** *** ***
ياهلال اعتب لچن ماظن يفيد
بيك ياخذ ثاره من حيدر يزيد
يذبح حسين ويحز منـّــه الوريد
يگطع اچفوف المراجل عالنهر
*** *** ***
ياهلال اشلون ظل نورك ينور
ياهلال اشلون ظل برجك يدور
ونته بيك اتزلزلت كل العصور
من وگع بالطف ابن سيد البشر
*** *** ***
ياهلال اليوم دم مطرت سماك
ونته صار احمر على العالم ضواك
حتى گلب العالم العلوي الوراك
من سمع بالطف تصدع وانفطر
*** *** ***
ياهلال اشلون الك عين وتشوف
جثة حسين التوذرها السيوف
والظلوع ابحافر اخيول الصفوف
تنسحگ والجيش يعبر عالأثر
*** *** ***
هذا نبراس العدل والتضحيات
هذا خط للامه منهاج الحياة
والجبال اتعلمت منـّـه الثبات
من تهب ريح المصايب والخطر
*** *** ***
هذا يهلال الشهر چبد الرسول
هذا چبد المرتضى وچبد البتول
هذا صوته الحيـّـر ارباب العقول
من وگف ويصيح لاوين المفر
*** *** ***
هذا ابن سيد الرسل والانبياء
هذا صوته الدوّه بچبود السماء
انذبح للدين قربان وفداء
وارسم ابأرض الطفوف اروع صور
*** *** ***
صورة التوحيد والحق والعدل
صورة العز والشرف للمايذل
صورة الماي وجمر چبد الطفل
وارسم الاخلاص بچفوف الگمر
*** *** ***
ارسم الاخلاص واهدم للعروش
والطغاة اتغور ببطون الوحوش
وافني جمع اصفوفها وكل الجيوش
والطفوف اترابه ينقل للخبر
*********** ************
للكاتب سعد الياسري
