انة عندي وطن اسمة العراق اليوم

انة عندي وطن اسمة العراق اليوم
جان اسمة كبل سيد الحضارات
بعد مامر عليه من الزمن اشكال
كل حاكم وضع لسمة عبارات
كل حاكم بدة يرسم بعقلة افكار
يوضع خطة ويكون شعارات
ينقلنة الزمن من فترة التكوين
ويوضعنة بزمن بيه انتقالات
وحدتهن تهزة الكون اسمه علوم
خلقت من تراب الصب عمارات
والاخرى تسابق شبخت الاوقات
صنعت جوة بحر الله قطارات
وحدة تشك جدار الغيم من اتمر
سموهة الفطاحل بالطيارات
وانة اعاين على اللي يحجي بالاخبار
لقد شهد الوطن عدة انفجارات
اكو مبدأ صلب اسمه عجيب شلون
مو اول امس جنة احنة سادات
معسكر صار ارض النبي المختار
ولازم تستعد للأختبارات
مليت الحرب والجثث فوك الكاع
ماضل بالجسم دم باقي بس قطرات
اونن على الليالي وابجي دم ودموع
والباب اليدك تسمعلة بس حسرات
تفكر بالديك شيحملك من اخبار
ها جابو جريح اوبي نفس لو مات
كافي مو متت كلساع اكول شلون
خلص كلشي بحياتي وضاعت الكلمات
اشوف الناس همهة الطلعة وين تروح
لو تبتكر سلعة وتعبر الازمات
ما محتاج انة وما امد ايدي الناس
ولا افكر اسد بيهة احتياجات
كبل تهابني كل بشر هاي الكاع
وهسة الكل يكلي ابشر سلامات
ولك زلزال انة بجفي اشك الكون
متوكفني ازمة ولاتدكني ازمات
اراضي الروح بيك وانتعش كل يوم
كلامي مساجل وياك بشكل همسات
علّي وطير يسمر حلق شمحلاك
عراقي املح وبيك شكثر شارات
اولهن غيور وصادق وفنان
واخرهن كريم وزارع البسمات
لتهم ياوطن ما دام احبك موت
انة وياك بفخر نصنع حضارات
مانحتاج نبني ونصعد اعلة الغيم
جواك اندفن مو بالعمارات
يسوقوني الكبر جنازة عالجتاف
ما مجبور تحملني الطيارات
وذا ردت انة روح الكربلة مشتاكـ
اروحن مشي ما اصعد قطارات
اذا انت الاصل والاصل ليك ايعود
يا سيد العلم يابو الحضارات

تحياتي لكل عراقي غيور

الله عليك قصيده جدا رائعه
بارك الله بيك وبيوطنيتك
دام مداد كلماتك الرائعه
وتقبل تحياتي وتقديري

شكرا لك على القصيدة الجميلة

دمت متألقا

تحياتي

عاشت ايدك حبيبي وتسلم على هل الابداع المتواصل

ولك زلزال انة بجفي اشك الكون
متوكفني ازمة ولاتدكني ازمات
اراضي الروح بيك وانتعش كل يوم
كلامي مساجل وياك بشكل همسات
علّي وطير يسمر حلق شمحلاك
عراقي املح وبيك شكثر شارات
اولهن غيور وصادق وفنان
واخرهن كريم وزارع البسمات
لتهم ياوطن ما دام احبك موت
انة وياك بفخر نصنع حضارات



ياعراقي يااصيل
والله وعاشت ايدك عزيزي
قصيدة جدا رائعة وموجعة
واحساس بالألم عميق

تحياتي لك ولهذه الروح العالية والسمو والعنفوان
والعراقي يظل مرفوع راسه مهما زادت النكبات

الف شكر لك
وماننحرم هذا الإبداع

الحقيقة ردودكم صابتني بالقشعريرة احساسكم بالمسؤولية تجاه ما اكتب يخلق تحتي روح مرحة موفقين بأذن الله ودام الله تواصلكم وشكراً لمروركم يها الزملاء الاعزاء.