وطن عّريس وعزوبية أمريكان

رضينه الإحتلال بحجة التحرير

وشعلنه شموعنه وبغداد شعلوها
أنهضمنه..ومارضينه الإحتلال يفوت
وفوگ المارضينه السرف مشوها
دعوني البارحة بحفلة عرس بغداد
دموع من الوطن للوطن دفعوها





وطن عّريس وعزوبية أمريكان
وبطايق زفته بالهمر ودوها
وگعدت لوحدي بشارع يصيح الغوث
وجه وبگصته اللچمات طبعوها
وجابوهه وأجت بس اشأجت بغداد
حته عيونهه من اللطم شلعوها
أجت بدلة عرسها البيضه دم و نار
النذال من الصدر للچعب شگوها
وبدل شدة ورد جابت بديهه دموع
ومن من ايدهه من الشعر جروها
ماچنهه بعرس چنهه بحفل تشييع
عالدبابه تمشي الحلوه جابوها
شفقات وخوذ من كل فصيله ولون
تنطيهم زلم وگبور ينطوها
فضوا چم بكاره بساحة التحرير
وقضية ساحة التحرير فضوها
وأجه العريّس محني وعمره ست آلاف
چي تنزف حضاره عيونه شدوها
گعد مكسور خاطر والظهر مكسور
من شاف العلم ساريته كسروها
يعاين عالحفل شو كلهه غربه الناس!
أجت وادم غرب والعرف طشوها
بس بغداد أجته وعرفته من بعيد
حضنهه وحضنته والدنيه بچوها
وحجتله شلون شعلوا بالمخيم نار
من سلبوا خدرهه وصاحوا أخذوها
شلون مسلبه يودونهه لتكساس
بس مو عالهزل عالدرع ودوها
شلون مچتفه وشلون عدهه أيتام
شلون الحسره تطلع من يشتموها
لطم وجهه العراق وصاح ياكرار
وينك ياعلي بغداد باگوها
ونزفت عينه دمومن بچه شافوه
باصابع من رصاص عيونه طفوها
وخذوه جثه وبقت بغداد بس تصيح
مبارك بس حلقته وياي خلوها
وجابوا حلقه بس مو ذهب من حبال
صعدوا عالمنصه وبيهه شنقوها
صعدوا عالمنصه وبيهه شنقوها

م ن ق

قصيدة حماسية وطنية
تتغنى بحب العراق وماثر الشجعان من ابطالها
بوركت اخي الغالي
ولانه تم نشرك لموضوع قبله اقتضى حذف احدهما
لانه لايسمح بنشر اكثر من موضوع واحد في القسم
تحياتي
مع فائق مودتي وتقديري

شكرا اخويه على المتابعه
منور الموضوع بتواجدك
ربي يحفظك ويخليك
تحياتي للطيب

مشكور اخويه الامير العراقي لهذه القصيده
الوطنيه الرائعه
لا تحزن يامير ان الله معنا
ما اتضل هيج ترجع لاهلهه باذن الله
تحياتي وتقديري لروحك الوطنيه

ان شاء الله
الله كريم
مشكور حبيب كلبي سلام على المرور الجميل
نورت الموضوع بتواجدك
تحياتي للطيب