رائعه أخرى من روائع المبدع جبار رشيد ( خذني يمك )

قصيده للشاعر المبدع جبار رشيد عندما أقرآها يتوقف عندي الزمن
أرجو أن تنال إعجابكم

** خذني يمك **

خذني يمك
بعد ماظل كل عذر لاتعتذر
ليل عمري وعمرك مخلص بعد مابيه صبر
خل نلم أحلامنه وناخذ صورهن
قبل لاياخذهن أبدربه الفجر
وخل نلم الباقيات سنيني وسنينك
نسويهن عمر
وهنه ميكفن عمر؟؟
ونبدي من جده وجديد
بواهس سنين الصغر
ولو وازانه الكبر
خل تمشي أيامنه بخطوة العاقل
من عثر مره ورجع يمشي حذر
وخل نعيش الحب ستر
خل نضم أرواحنه أبيناتنه
وي أسرارنه وما نشتهر
وأفتخر بيه وي روحك
وآني وي روحي أضل بيك أفتخر
خل نسوي العشره ورقه
ونصنع من الدمعه والضحكه حبر
حتى كل لحظه التمر بالجاي نكتبها شعر
وخل نكول الماضي غلطه
وذنب يسجل ذنب من ينذكر
حبني لتضل تعتذر
حبني وأجبرني على حبك
الروح ماتعشك لون ماتنجبر
السيف ماينهاب لوماكو الطبر
حبني لتضل تعتذر
وأعترف راح أعترفلك
وأحنه شو نفس الأمر ...!!
أثنينه أنبعنه بسعر جوه السعر
أثنينه أنبكنه حدر شمس الظهر
أثنينه السجين تانتنه نذر
أثنينه أتوهمنه بالحب ننتصر
أثنينه أنعاني الغدر
وأعترف راح أعترفلك
كلبي جان شكد جسر
وآنه جتفت الجسر
وآنه وزيت الحمامه أعله النسر
وأسمع السر الخطر
صنم سويته أبديه
وادري ماينفع يضر
وحاطه كبالي وعجيبه الشوك
من عنده أنتظر
وأنته مثلي بهالأمر
صنم سويته بديك شتنتضر
خل نهدم أصنامنه وكافي الكفر
وبلكي نهده ونستقر
وبلكت وياك وآنه وياي أستمر
وبلكت المامر كبل هسه يمر
وبلكت جناح العشك لبعيد ياخذنه ويفر
ونترك الممنوع والميصير
خل نغط بالماي من صرنه جمر
وبلكي نصحه من السكر
خذني يمك كبل لايخلص صبرنه
ويطفه دم وجوهنه وتطلع صفر
خذني يمك كبل لاينحك ذهبها
أطباعنه وتطلع صفر
خذني يمك كبل لا
يم الصفر ينحط صفر

تحيــ الطائي ــاتي

قصيدة للغالي وحبيبي وصديقي العززززززززززززززيز جبار رشيد
شاعر ذو احساس فوق السحاب
تحياتي لك حبيبي الغالي على نقلك واختيارك الجميل

قصيده رائعه بكل معنى الكلمه لشاعر كبير
تسلم اخي الطائي للنقل والمجهود
دوم الابداه يارب
تقبل تحياتي وتقديري
وكل عام وانت بخير

تحياتي وتقديري لكم ولمروركم اللي اسعدني جدا
وعيد سعيد يعود عليكم بالخير والمسرات وعلى بلدنا واهلنا بالامن والامان
اللهم ارفع هذه الغمه عن عراقنا الغالي


تحيــ الطائي ــاتي

يسلموووووووووووووووووووو
قصيده رائعه