مطار النجف وسفارة العراق في السويد وجهان لعملة واحدة

بسم الله الرحمن الرحيم
مطار النجف الاشرف
وسفارتنا في السويد وجهان
لعملة واحدة

الزمان
ذهب وولى
المكان
مطار هدام الدولي سابقا ومطار بغداد حاليا
كنت مسافر الى احد دول شرق اسيا
وعند عودتي الى بغداد
نزلت في مطار هدام الدولي سابقا ومطار بغداد حاليا
وبدات رحلتي مع مشوار العذاب
منين جاي
يابه من فلان دولة
زين مو موجوده اسم الدولة التي قدمت منها الطائرة ورقم الرحلة هذا السؤال
شنو الداعي له
زين
شنو هاي الي بالجنط
يابه هدايا للاولاد والاصدقاء
زين مو هي مرت على جهاز التفتيش
وكلشي مبين
افتحه خلي انشوف
زين اشلون اذا فتحتها ياهو الي يكدر يسدها
اذا اني وياي احد الاخوان بقوة الضغط يالله انسدت
امري لله الواحد القهار
افتحنا الجنط
ضل ينبش
هذا القاط الولادي اشكد سعره بالخارج
سبحان الله
عبالك تعرف قياس ابني
شني السالفة
ايريد ياخذ القاط الولادي
انطيته اذن الطرشه
بس هو عزل القاط على صفحه
هاي الحذاء عفوا
جلد ايطالي اشكد قياس
كتله
41
كلي كانما انته في نفسي
اني البس 41
وعزله على صفحه
الي يزيدك قهر
انه وجه عبوس
وحواجبة مقطبه
وكانما انا داخل تهريب او جايب قجق
زين هاي العطور افرنسية
اقرائلي ماركاته
طلع الاخ حتى ما يعرف اسم الماركات او يعرف يقراء انكليزي
كتله
هاي
بيوريويزن (ديور)

زين
المصيبة
ما تعرفه شنو
لابس زيتوني
والله
حتى خلوني اكره الزيتون الاخضر
ومسدسه بحزامه
كمارك
امن
مخابرات
شرطي
طركاعه
ما تعرفه شنو
بعد ان انهى عزل ما يريد
واخذ ما استلذ له وطاب
ولا جزاء ولا شكورا
كلي انته عليك منع
كتله منع من السفر لو من الدخول
كلي من السفر
كتله اني داخل الان ومن الي مانعني من السفر
واني صارلي اسبوعين غادرت العراق
كلي هسه انته شلك شغلة
اني ارتبله الك
وي جماعتنا
كتله اعيوني
اخذ الغراض وانطيني جوازي وخلي اروح
وانته رتبه على كيفك وي جماعتك
خفت انوب ايروح ايجيبلي جماعته
وياخذون نص الهدايا
واطلع
اني مسوكجي عدهم
اخذت جوازي وانهزمت بالعزيزة
وكلت وي نفسي
الله الي يعوض
\\\\\\\\
ما الداعي لكتابة هذا الموضوع
على كيفكم لاتستعجلون
انتظروا شويه
انطونا عطوه

الزمان
16 \ 11 \ 2009
المكان مطار النجف الاشرف
نقلا عن عائلتي
وصلت الطائرة القادمة من دمشق الساعة
العاشرة والنصف صباحا
نزل الركاب
الى صالة الحقائب
ولا ان عائلتي لايستطيعون حمل الحقائب لكبر حجمها ومرض زوجتي
لاننا العراقين ولله الحمد ماكو شي ما ناخذه ويانه
عشرات السنين لم يشاهدوا العراق ولم يشاهدوا الاهل
منهم من توفاه الله ومنهم من كبر بعد صغر
ومن من صبغ الدهر شعرةه باللون الابيض
التفت زوجتي الى احد الضباط
ونخته
ان يساعدها في وضع الحقائب على العربة المخصصة لحمل الحقائب
والله والله والله
راسا
كان جوابه
مو تامريني
انتي خطار اهل النجف
بعيوني
والتفت الى احد افراد الشرطة وتعاونا على حمل الحقائب ووضعوها على العربة
الف تحية وتقدير لهذه الشهامة
وصلت زوجتي واطفالي
الى حزام التفتيش
وهنا انعادت نفس العملية
كيف يتم انزال الحقائب من العربة الى حزام التفتيش
وانتخت باحد الموظفين المتواجدين بالقرب من مكان التفتيش
وما ان اكملت كلامها
الا وشمر عن ذراعيه
وبهمة الرجال الغيارى الشرفاء
راسا
بعيوني وبالخدمة
هذه الكلمات المدوية
من الاحترام والترحيب
اذهبت كل التعب من طول السفر من السويد الى الى دمشق الى النجف
تم وضع الحقائب على الحزام ومن الجهة الاخرى
صاح الاخ الذي شمر عن ساعدية
الى احد اصدقائه من الموظفين
بان ينزل الحقائب ويضعها على العربانة
وما كان جوابه الا
اجمل والطف من سابقه
مو على راسي
هلا
بزوار الامير علي
هلا بخطار النجف
انتهت الصورة
المقارنة
الفرق
الزمان واسماء المطارات
والفرق الثاني
البشر الموجدين في هذه الاماكن
كيف تم اختيارهم
وعلى
اي
اسس
ووفق
اي انظمة
وعلى
اي حسابات
انه الاختيار الصحيح لغرض اعطاء صورة مشرفه عن الواقع الصحيح للعراق العظيم
سبق وان كتبت موضوع عن السفارة العراقية في السويد بالوان الطيف
بموجب هذا الرابط
http://www.alforat.org/showthread.php?t=100729
وان التشابه في اسلوب وتعامل موظفي سفارتنا في السويد
واسلوب وتعامل موظفي مطار النجف في العراق
هو
وجهان لعملة واحدة
سفاراتنا في السويد تعج بالهمة والتفاني والعمل الدؤب وانجاز معاملات العراقين باسرع واقصر الطرق القانونية وتقدم الخدمات التي افتقدناها نحن المغتربين في ايام النظام السابق
الكل يعمل
الكل يحاول جاهدا ان ينهي المعاملة بقدر ما متاح له
التصرف والتكيف القانوني
الكل يتعامل بمساواة مع الاخرين
دون النظر الى القومية
انت عراقي
اذن انت
موجود في السفارة العراقية
لا علاقة لقوميتك
عربي
كردي
شبك
ايزيدي
صابئي
مسيحي
تركماني
انت تحمل اسم عراقي

ومطار النجف الاشرف
الموظفين ينجزون معاملة الدخول ومنح التاشيرة وختم الجواز وتفتيش الحقائب
باسرع وقت
دون تلكاء او تململ او دون ان يقولون
هذا القاط على كد ابني
لو هذا العطر فرنسي
لو هذا الحذاء ايطالي واشكد قياسه
الابتسامة لاتفارق وجوههم
الشهامة صفاتهم
النخوة هويتهم
العمل الدقيق واجبهم
التوجيه الصحيح للمسافر مسؤليتهم
اذن هكذا ننتظر من بقية سفارات ومطارات العراق ان تتحلى بصفات
موظفي
سفارتنا في السويد ومطار النجف الاشرف
هم
وجهان لعملة واحدة
وهي
العراق
ولا شيء اخر
بديل عن العراق
الف تحية اجلال واحترام وتقدير لموظفي سفارتنا في السويد والف تحية اجلال واحترام وتقدير لموظفي مطار النجف الاشرف
لما يقدموه للعراقين

وفق الله العراق والعراقين الشرفاء
والله من وراء القصد

والله ياابو الغيث كلامك بالصميم وهذه الكارثة الكبرى الذي يعاني منها المسافرين

في مطار هدام الدولي سابقا ومطار بغداد حالياً

من باب اللطيفة اذكرلك هذه الحادثه

في احد السيطرات كان قاضي معانا في السياره وهوية القاضي معروفه

تحمل علامة الميزان .....الخ

بعد السونار والتفتيش السياره من كل مكان ومنين رايحين ومنين جايين

وبعده هذا الافندي الي بالسيطره

مو هذا كان يشتغل بتاته يعرف يقرأ يعرف يكتب

اخذ هوياتنه وركز على هوية القاضي

كال سبحان الله حتا البقال مسوي هويه


ومااريد اذكر الحادثة الي صارت لان القاضي اهان هذا العسكري بشكل مو طبيعي


ندعوا للجميع الهداية والتعقل


تحياتي وتقديري

السلام عليكم
مشكور اخي ابو الغيث الصراحة موضوعك وكع على علتي
بيوم 3_8 _2009
المكان مطار بغداد
الرحلة من بغداد ومن ثم اربيل ومن ثم الى ستوكهولم
انا عائلتي معي
وانا حاجز قبل عشرة ايام التذاكر من مكتب الخطوط الجوية العراقية بالاعظمية
موعد مغادرة الطائرة
الساعة السابعة مساءاا
لااطل عليكم؟؟؟
وصلت عند شحن الحقائب الساعة الخامسة
والا بطابور من الناس الذين ينتظرون شحن امتعتهم
ننتظر
وننتظر
للساعة السابعة
والا بمدير الخطوط ياتي وباسلوب غير حظاري
الطيارة قبطت وماكو مقاعد فقط خمسة دبرو نفسكم!!!!!!!!!شوف الفرق
واحنا باقين 15 مسافر
وماهو السبب بسبب بيع مقاعدنا بالسوق السودة
والاشخاص الذين يتم تهريبهم دون كتابة اسمائهم عند الخطوط الجوية
الخ.....
انا عائلتي خمسة اشخاص وانا السادس ومن ضمننا ثلاث اطفال
ولاني كنت مستعجل جدا وطائرتي الثانية للنرويج بعد وصولي للسويد ب4 ساعات
يابة انطينا وامرنا لله 3 مقاعد والاطفال بالحظن على الرجلين والله كريم
الساعة 8 ونص طارت الطائرة المهجومة بالطاقم الاردني لان الخطوط الجوية العراقية ليست لديها طائرات
والحمدلله مشينة وميخالف
الطامة الكبرى
عند وصولنا للسويد وذكرت بعد 4 ساعات طائرتي الثانية للنرويج
ذهبنا لستلام الحقائب والا ولاا حقيبة من اصل 9
المهم تركناهم وسافرنا وبعد اتصالات واسطات الجنط وصلن بعد مرور عشرة ايام الى البيت في
اوسلو بمساعدة مطار ستوكهولم لان الاوربين كلمتهم وحدة مو مثل جماعتنة!!!!!!!!!!
والسلام عليكم
اعاننا واعانكم الله على مصائب العراق

السلام عليكم ورحمة الله وبركاته
وانا اقرا موضوعك قد غمرتني السعادة والفرح
للتطورات التي تحصل داخل القطاعات العراقية
وما احوجنا اليوم الى احداث ثورة عارمة
تعم العراق شرقا وغربا من اجل محو الصورة السابقة
التي كانت فيها الدوائر الحكومية وشبه الحكومية
وكأنها مخفر شرطة او مكافحة اجرام..
لقد ولى الزمن الماضي بحلوه ومره ولا نأخذ منه غير الدروس والعبر
لنصحح بها الاخطاء والهفوات التي تحدث اثناء حياتنا اليومية
وان التسلط والاستقواء بالمناصب لايجلب غير التخلف
والتراجع الكارثي على كل المستويات.. ونحن اليوم ندفع ثمن السياسات
المتخلفة التي حكم بها العراق من قبل الانظمة المتهالكة .
فاالف الف تحية من الاعماق
لكل عراقي شريف يعمل بما تقتضيه عليه مسؤلياته الاخلاقية والوطنية
ونحن نتوسم بهم ونجعلهم المثال والقدوة
التي يحتذى بها
وبسواعدهم سيبنى العراق
وتستعاد الامجاد
وسيبقى العراق حرا ابيا كريما
بجهود ابنائه المخلصين..
شكرا لك اخي الكريم
وتقبل فائق احترامي

شكرا اخي ابو الغيث المحترم
على المعلومات وانشاءالله تصل الى كل العراقيين على التعاون في بناء العراق الجديد

تحياتي وتقديري

شكرا ابو الغيث علئ هذا الموضوع
الجميل
الحمد لله اني ماعندي قصه احجيها لان بعدني مشفت الحدود
بس حدود السعوديه
ايام السجن في نقره السلمان
بس هناك ماكو اجهزه تفتيش اكو اجهزه قمع
وضرب وكفخات

شكرا ابو الغيث علئ هذا الموضوع
الجميلوالرائع.... وياريت كل العراقين يصيرون يعملون بحرفية وأتقان للعمل. شكرا أخي..

اخي العزيز ابو الغيث
الشيء بالشيء يذكر
بصدد أمية بعض منتسبي حرس المنشات الحكومية

المكان : ساحة ميسلون

اوقفني عنصر الحرس الوطني وقد اوقف مسبقا شخصان غيري لم يحملا اي مستمك معهم
فطلب مني ابراز هويتي فامتثلت له بابراز هويتي وكانت تحمل عنوان شركة حمورابي للمقاولات الانشائية

فوجه قوله الى صاحب السيارة الذي لم يحمل هويته لائماً وقال بالحرف الواحد

{{ يا اخي صير مثل الولد شايل هوية مال طالب }}


ايها الاخوة ليس القصد بان ننكل بعناصرنا الامنيين
لكن مثل تلك الحالات تكون وصمة ...... ونقطة حبر من الصعب التعامل معها
وفي النهاية نسال الله ان يحفظ العراق العراقيين انه على كل شيء قدير
سلامي:66 (46)::66 (46)::66 (46):