يالخدك شذر وشفايفك ياقوت
وعيونك عسل ودري العسل وصفه
بس بعسل عينك شي غريب الكيت
ينصاب التخزره بلحظته ويشفه
لبنان وحوت من الجمال اشكال
بس شكلك جذب محد وصل طرفه
ارموشك جنح فراشه نعسانات
الف هنياله البين ارموشك اليغفه
ويالركبتك لؤلؤ ليها لو صديت
اذوبن شمع يمك وشتعل وطفه
يظل امكابلك ما يمشي ثلث سنين
وذا اتساله على اسمه ايكول ما عرفه
سبحانه الرسملك وجهك او سواك
اظن ست اشهر الله ايسوي بالشفه
خلاك بمكان الشمس راد اتصير
بس شاف الشمس زعلانه منكسفه
كسرة خاطره وفوك الارض خلاك
تعكس عالكمر لن نوره ما كفه
وارسمك ردت مره وجبت كومه اقلام
وعندي وي الرسم من الزغر حرفه
كمت ارسم وشكك وحرك ومحتار
لن عنك معاني الصوره مختلفه
وخيرا ويه كلبي اتباصرت بسكوت
كل عقلك كلتله امصدك اتوصفه
يمعود دبطل دنعل الشيطان
غير الي بالك شوفلك صرفه
.................
م/ن
