## قصيدة البلوى للشاعر جبار رشيد ##

بعد ما ادير ظهري
الياهو الچان
او وصل حد الحذر حتى اوية اخوتي
بلوة امن احچي
من اسكت بلوتين
وحچي اليكره صفة رابع بلوتي
اشتريت وادري بيهم
ما ينفعون
وقبل( العمله) خسران بشروتي

ليلي العلماهم ...
رمي الچيلات
الحرامي منكتل كتلوا هدوتي
مشيهم مرتبك
يتوسل الگاع
وانه الگاع اثبتها بخطوتي
البعض منهم يسولف
ما حچوا بيه
وانه الناس يحچون بسكوتي
ما يسكت ابد ما
خايف اعليه
جروح (الفقرة) انه الطلعن صوتي
انه مهر البخت
والعزة والطيب
اتطشر خير عثراتي وكبوتي
ما ذليت مره
الدنية مطراد
الدرب يعرف حجم دوسة (حذوتي)
ما اصيرن اسد
هم بيه خلل هاذ
ذلة الصيد ال جيبه( لبوتي)
ما دورت راحه
وشهدوا الايام
اول ما صرت دورت موتي
الفاتن علي
اعرف مشن وين
وما نادم على الگلتلها فوتي
(كنز )عندي ويعيش
ولد الاولاد
محبته الناس كل كنزي وثروتي

للشاعر
جبار رشيد

ليلي العلماهم ...
رمي الچيلات
الحرامي منكتل كتلوا هدوتي


القصيدة رائعة وخصوصا هذا المقطع
شكرا لك اختي البتول واحسنتي الاختيار

اختي البتول
قصيدة جميلة راقية في المعنى
اثني على حسن اختيارك
ننتظر منك الجديد
تحياتي

عاشت الايادي كلمات في غاية الروعه لانها من شاعر مبدع

اقتباس:

---

المشاركة الأصلية كتبت بواسطة فارس الهيجاء

ليلي العلماهم ...

رمي الچيلات
الحرامي منكتل كتلوا هدوتي

القصيدة رائعة وخصوصا هذا المقطع
شكرا لك اختي البتول واحسنتي الاختيار

---

حياك الله اخي الغالي
مشكور على هذا المرور

تحياتي