شوربة لسان العصفورة

مرحبااااااااااااااا ما اعرف اذا تعرفون هاي الشوربة لو لا و اذا تعرفوها فاني راح اكتبها للمايعرفها و نتوكل على الله
المكونات :
لحم مثروم + راس بصل + معجون طماطة + طماطة + لسان العصفورة + معدنوس + حامض و بهارات +شوربة دجاج او لحم
اللي مايعرف لسان العصفورة فيكون شكله نفس شكل الحبة الرز
زين هسه نبلش بسم الله
اول شي نسوي نخلي شوية زيت نحمر بيها البصل و بعدما يذبل نخلي اللحم نحمسه ويه البصل و بعدما يحمس نضيف الفلفل الاسود و البهارات هسه نضيف الطماطة فد شي حبة او حبتين نثرمها و نضيفها الى الحميس و نضل نحمس الى ان تحمس الطماطة و بعدين نضيف معجون الطاماطة و همين نحمسه و بعد هذا كله نخلي المقدار المطلوب من شوربة الدجاج او اللحم حتى يفور كل هذا الحمس بيها و طبعا قبل السكب بفترة قليلة انضيف لسان العصفورة و نخليها تفور و نضيف ويايها عصير الحامض و الملح حسب الرغبة و هيج نخليها تفور فترة 5 دقائق و بوقت السكب نضيف المعدنوس المثروم ناعم الى الشوربة و نخلطها و نقبغ عليها شي دقيقة بس حتى المعدنوس يذوب بالحرارة البخار و بعدين تسكب و تؤكل بالهناء و الشفاء

والله مبينة طيبة الف شكر ياوردة

بس اسمها حلو وغريب شوية

تحياتي

هههههههههههههههه والله اول مقريت الموضوع عبالي صدك نجيب لسان عصفور كلت شلون اروح اجيب عصفور واكص لسانك علمود نسويه شوربه كلت لا حرام ميصير هيج بس لما قرايت المكونات عرفت انو غير شي
يسلمووو على الوصفه

اخوية بصراوي هاي الشوربة طيبة بالقراية بينما تكون كلللللللللش طيبة بالطبيق دجربها و كولي رأيك و بالعافية

عزيزتي سومة لا تجيبين عصفور و لا لسانه تره هاي شوربة مو باجه هههههههههههه دجربيها و كوليلي رأيك و الف عافية

تسلمين عزيزتي , بس اني اسويها غير شكل
اني اكور اللحم المثروم الى دوائر واقليها بعد ما اخلط وياه البصل والبقدونس والبهارات
وبعدين اضيفه الى مرق الطماطة الغليظة والمضاف اليها منقوع التمر هند

اكو اختلاف , بس شنو تقصدين بـ لسان العصفورة ؟

عالعموم اسفة اذا طولت ومشكورة على هذه الاكلة

اختي الحالمة لسان العصفورة هي نوع من انواع المعكرونه و تكون شكلها و حجمها بكد حبة التمن و اذا انت بالعراق فاحنه ماعدنه بس ما اعرف اذا دخلت وره ما اني طلعت من العراق
و هذيج غير نوع الكفته اللي تسويها بالمرق المركز هذيج اسمها راس العصفورة لان بصراحة هذيج امي تسويها بس هاي الشوربة لانو اسهل مابيها اكمش لحم فاني اسويها هههههههه
والف عافية