ألو .. وطني آسف انگطع الخط
آسف انگطع الخط
ألو ..
ألو ..
ألو ..
وطني .. حبيبي .. عمري
أرجوك ما أسمعك
بلكي تعلي الصوت
أسمع رصاص و بچي
وعبر الأسلاك الدمع
يوصل وريحة موت
أسمع صياح ولغط
ومناداه يا هَل الربع
خل نرفع التابوت
أسمع عياط ولطم
وأم تنعه يا هلَ الولد
يلغربت بسكوت
ويل چنت وكت المسه
بيدك تگود الگمر
وتصيرله زاتوت
ويل چنت شمعة عرس
من تنطفي الكهربة
خدك يضوي بيوت
وچان الدرب يستحي
ويلوذ من خطوتك
لو ردت مره تفوت
مـاخـاف لـيل اليجي
مادام في معصمي
يوليدي تضوي بتوت .
ألو ..
ألو ..
ألو ..
مــاأســمعـك يـاوطـن
بالخط إجت وشوشه
وإرتفع صوت القصف
وصوت أَب يگل للولد
شـد روحـك بعـتبتك
يـولـيدي لا تنخـطـف
البارحه أعلِنَوا:
مجموعه ذبحت شمس
والصبح شفنه الصور
نشرتها كل الصحف
وأنباء أخرى إجت
عن إغتيال النهر
من سَيَّرْ إعله الجرف
والثالثه عن حقل
حرگوا ا ثيابه ومشِوا
والحال ما تنوصف
ومن قبل أول أمس
طَوقوا بيت اللغه
وباگوا ا بقايا الحرف
شدينه إيد الشرف
والطيب والمرجله
وأطلقنه إيد العنف
ألو ..
ألو ..
ألو ..
يمكن الخط إنقطع
مَيْؤَوسْ من هل الوضع
ماينصلِح هالظرف .
ألو ..
ألو ..
ألو ..
آسف ولا ينسمع
والصوت مو الأولي
الصوت أحس مرتبك
ذبـلان ورد الحچي
بشفافك ومنكتل
من حقي لو گمت أشك
آني عـرفـتك قبل
من تحچي ينزل رطب
والدنيا تمطر ضحك
وبكلشي أشوفك تهل
حتى الصبح من يجي
ويه الشمس تشترك
وما چان واحـد قبل
ياخذ رگبتك غفل
لو صار وكت العرك
وما بالَغِت لو گلت
چنت أويه موت النِزَلْ
لو زامطك تشتبك
والآن ياموطني:
دنگت لأصغر قزم
والچان يحلم قبل
يوصل الحَد الورك
معقوله ياموطني
إتخلي الگمر ينذبح
وسِتْر الشمس ينهتك؟ .
ألو ..
ألو ..
ألو ..
وطني .. حبيبي .. عمري
چن بلهاتك جَرِحْ
من تحچي أحِسْ مختنگ
شــايل بچفك نــهـر
مـيت ونخله إنكـتل
مـــــــابـين إديـهـا العثگ
شايـل بچفك وطــن
مذبوح من كل كتر
وبثوبـه ريحة حــرگ
مـن چنت أبـوسك قبل
خـدك يوَرِد هـوى
ومـثل الگمر تعتلگ
والآن ياموطني
دم بلبل براحِتك :
يابس وريحة كتل
توصلني كلما تمر
نسمه إعله جثة
العشگ
هم شفت قبلك وطن
كتاله شعبه وزرَع
بثيابه مِيَة فتگ ؟
إحچي أريدْ أسْمَعَك
مايسوه باقي العمر
لوما تگول الصدگ
يلنعشَك إعله الچتف
شلته بعد ماشفت
گطعوك من العِرِگ
ألو..
ألو ..
ألو ..
وطني .. حبيبي .. عمري
الليله كاس الحزن
أرد أشربه بصحتك
مرت سنه من قهر
وسنين راحت تچي
وأنت على حـالتــك
دورت بين الصور
گلت ألگة بلكت ولو
شي باقي من ضحكتك
وفجأة:
إتفَجِرَتْ قنبله
مزروعه وسط الصور
والدم ترَسْ راحِتك
ودخان عالي إرتفع
ما گمت أمَيّـز بعد
رجليك من هامِتك
كتلوك ياموطني
أهل الوجوه الصفر
واللي گرط ملحِتك
گابلني شيل النعش
أرد آني أدفنك وأرد
أحچيلهــــــم قصِتك
لكن غريب الأمر:
إشلون أدفن ضوه
وياگاع تگدر تلم
ياموطني جثتك؟
منقووووووول
رد: ألو .. وطني آسف انگطع الخط
الف شكر لك عزيزتي
على هذا الاختيار الرائع
كلمات احرقت الفؤاد والوجدان
ودموع تسابقت بألم ووجع
انه الوطن ,,,, عراق الخير والنخوة
عراق الطيبة والناموس والغيرة
يؤسفنا ان نسمع وان نكتب مثل هذه الكلمات بحقه
ولكنه الواقع المر
حفظك الله ياوطن وحفظ شعبك من كل مكروه
وحياك الله عزيزتي في منتداك وبين اخوانك
ننتظر مشاركاتك القادمة
لك اطيب تحياتي
رد: ألو .. وطني آسف انگطع الخط
albaghdadyia
نقل مميز
وجميل
وان دل على شيء
فانه دليل ذوق رائع
واحساس بالكلمه الجميله الصادقه
تمنياتي لكي بالخير والسلامه
ابنتا
albaghdadyia
تقبلي
مروري
رد: ألو .. وطني آسف انگطع الخط
والله فتت كلبي هل كلمات
لكي كل الخيروالسلامه
رد: ألو .. وطني آسف انگطع الخط
شكرا لجميع من رد على الموضوع
وربي يحمي العراق من كل سوء ويحفظ شعبه
رد: ألو .. وطني آسف انگطع الخط
وان دل على شيء
فانه دليل ذوق رائع
واحساس بالكلمه الجميله الصادقه
تمنياتي لكي بالخير والسلامه