ليش هجرتوا العراق

[بلو سكاي]

ليش هجرتوا العراق مو هذا ابو الطيبات هذا التعب على مودكم هيجي اتعوفوا وتروحون واحلف بالله العظيم لو هو ابمكانكم كان ما سوة هيج الى كل من يقول اني عراقي ويحب العراق بصدق فليرجع له
ابصوانينه بعد ما ضلت اشموع
ولا فرحة طفل مصباح عيده

[بنت عمر]

طلعت غصبا عني ومو بأيدي ارجع لو بأيدي ارجع اليوم قبل باجر
مشكوره اختي blue skyعلى سؤالك المحزن جداااااااااااا

[ذيب الغزالية]

أخي الكريم سؤالك حزين جدا

ولكن ..!!

ما الذي فعله العراق لنا لكي نبقى ؟

وما الذي لم يفعله العراق بنا لكي نبقى ؟

تهديد واتهددنه تفرقه وسوو بيناتنه أمان ماكو كهرباء ماكو حته الماء كطعوه علينه

صار الاخ يعلس بأخوه

يا دين يرضه هذا الشيء ؟

انطيني سبب مقنع انه أظل بالعراق ... لتكولي بلدك و و و و و و

لكينه كل الشغلات اللي نتمناها بغير بلد ومهما يحصل لن ولم نجدها في بلدنا

:66 (46): أخوكم : عمر الحجار أبو الفاروق :66 (46):

[abdooooo]

ابو الفاروق الله يكون في عونك
السؤال ابدا ما محزن ولكن اقدر اقول قاهر مغيظ
اسمعه اغضب ليس لانهم هجروا العراق الحبيب وانما
لان هناك اناس اجبرونا على هجره ااااااااااااااااااااااااااه

[نضال حسن عباس]

حكمتنه الظروف نعيش مقهورين بالغربة ومو صعب نعود للعراق المنتصره ...غصبا عنه طلعنه من عده ياريت يجي اليوم ونتفيه بفيه

[aliraqia]

السلام عليكم ورحمة الله وبركاته.
اذا ببدي ماطلعت من العراق شفتو انسانه تعوف روحه وتروح
من طلعناكنت بنيه ماعرف اكَول بابا
ماكَدرت احجي واكول للاهلي اريد ابقى
وارجع شلون ؟
يعني اخلي اهلي وارجع؟.
مع السلامة و في رعاية الله.

[قطـر النـدى]

سلمتِ اختي على سؤالكِ
والذي يهجر العراق لا يهجر ترابهُ واحضانهُ
انما تبقى روحه هنا وجسده في بلاد الغربة
ومن هجر العراق هجره لما عاني فيه من ظلم
لا ترضى بهِ الأنسانية وهاجره لانقاذ نفسهِ من الموت
بقولهِ تعالى (( ولا ترمو انفسكم في التهلكة ))
وقولهِ ((أن ارضي لواسعهٌ))
مختصر الشرح بأن الأنسان مهما استطاع ان
ينقذ نفسهِ فليعمل بما قدره الله عملهُ لانقاذ
روحه من التهلكة
الا وهي القتل والخطف والأوضاع التي يشهدها
بلدنا الحبيب حالياً

دامَ عطاؤكِ عزيزتي

:
:

قــطر النــدى

[اميرة الورد]

مرحبا اختي موضوعج جميل وسؤاك اجمل اني اكول انه الناس الي سافرو من العراق ذهبوا للدول المجاوره اكيد عندهم الاسباب واكثر الاسباب عدم الاستقرار والتفرقه والامان واتمنى انه العراق يرجع مثل قبل والكل ترجعله شكرا لك

[ام زينب]

اختي العزيزة.. لا تتصوري يوما ان عراقيا بعيدا عن العراق يشعر بالسعادة في اي لحظة. حتى لو كان يسكن في بلد هو قبلة للسياحة والمتعة والترفيه ومهما كانت نسائمه واشجارة جميلة تبقى النخلة العراقية اجمل شجرة في عين العراقي وتبقى الشمس في بلادي اجمل ويبقى تمر العراق الذ من ارقى واثمن الحلويات في العالم. يبقى العيد في العراق اجمل مهما امتزج به من الام وفقدان للاحبة. لا تتخيل ان العراقي يهجر بلده حتى لو كنا خارج العراق فالعراق في داخلنا ورائحة ترابه تملأ انفاسنا ويبقى هو بعد بيت الله قبلتنا وقبلة العالم. وسنبقى رغم كل ما نتعرض له في الخارج من متاعب لمجرد اننا عراقيين نفتخر بعراقيتنا. لأننا الشعب الحيد الذي يستمر بالتحليق رغم النار التي تلكلنا ولن نسقط انشاء الله طالما على الارض بشر.
والحقيقة ان هذا ليس شعور العراقي ولا راي الشخصي فقط بل كل انسان صادفته يذكر العراق والعراقي بكل ما قلتة.

[بنت مثل النجوم العالية]

الى اختي وعزيزتي طبعا سؤالج محزن لان شوقتينا للعراق العظيم وذكرتينة باايامنه الحلوة الي عشناها بيه وبنفس الوقت سؤالج يخلينه نحمد الله ونشكرة طلعنه من ارض العراق احياء ويمكن اله ارادنا نفترق ويرجع شملنا بعد تحرير ارضه من الظلم والمأسي ال تصير بيه
حكلمج عن قصتي بشي مختصر
بنت بعدسقوط بغداد تزوجت زواج سريع عن طريق الصدفة انا بنت عائلة جدا راقية واهلي تهددو وسافرو كلهم لسوريا ونصفهم لالمانية وفجئة اجد نفسي لوحدي في بغداد مع زوج وطفل عمرة 9 اشهر في احشائي وتظهر لي مفاجئة زوجي لم يكن صدفة متزوج بي بل لااجل مال اهلي ولتهدديدي واخراجي من العراق لا املك شي سوة جواز سفري وفلوس البهبان الي جابني لااهلي حتى ولم يقبل ان يطلقني بالعراق الا برشوة

فكيف اتذكر حلو العراق قبل السقوط وكيف اذوق مرارة النفوس الضعيفة بعد 2003
وشكرا لفتحك الجراح

[ديفد كوركيس]

ااوختي العزيزة لا تتصوري عراقي بعيد عن وطنة وفي الغربة وعايش ابسعادة لان غربة متنراد ابدا واني قرائت كلامج وشتاقيت اكثر الوطني واهلي وشوقتيني ان ارجع الى الوطني الحبيب واني هوايا ضايج من الغربة

[انجي العراقية]

لاتصورين احنه مرتاحين
الغربه ضياع ..بمعنى الكلمه
بس من لاجاره علمود الامان لا اكثر ولا اقل
الغربه كربه.........:66 (46):

[شيماء الموسوي]

منو هذا الي يعوف اجمل بلد بالعالم والله لكل من يسمعني ياعراقيين لو تفترون الدنيا كلها مراح تلكون احن من بلدكم عليكم رغم الضروف الصعبه يبقى العراق شامخ وصامد وانشاء الله يرجع اقوى من الاول بس والله هو قوي بينا احناوعشتي اختي على هذا الموضوع الحلو

[محمود سات 1]

الى الاخت العزيزه بارك الله فيكي على هذا الموضوع الذي هو بالصميم وانشاء الله نرجع نملك الدنيا قولو امين