مطاردة شعرية (بالابوذية )

[Broken oars]

مساء النجوم والليل الهادئ على الغالين

غايب صار الك سنتين ماجاي
وكلف موج العتب يهواي ماجاي
اصبر عطش روحي اليوم ماجاي
وتحيا ورود دلالي عله ميه

حرف القاف لكم
تحياتي

[فاتن وهيب شاعرة المنتدى]

احلى تحية وحرف القاف

قسم بالشوك مايخلف وعدلي
وكثير عهود سامالي وعدلي
عدل ماظن عدله وعدلي
مثل ماباع ودي ايعود اليه

وسلامتكم

حرف الثاء

[Broken oars]

احلى تحيه لك ومساء الخيرات يا فاتن العزيزه

ثراكم مسك دلالي ولي طاب
وهواكم مرهم جروحي ولي طاب
بعدكم شلي باليطلع ولي طاب
مدام انتم سكنكم بين اديه

حرف الجيم لو يسمح وقتكم

[ابو نرجس الحلي]

جيت وبعت سري الك بالذات
بس انته ياحسافه طلعت بالذات
الخلل مو بالوكت يفلان بالذات
وفرق بين الوفي والذاته رديه
سلامتكم ....حرف الطا

[فاتن وهيب شاعرة المنتدى]

طلبتك ماكلتلى ابشر ولا هاك
شجاك وغيرك عنى ولاهاك
ضميرك لازم يانبك ولاهاك
هم يحاسبك باجر عليه

مساء الخيروالعافية


وحرف الجيم يابروكان اكتبلك واكول

جارى الاتصال وياك جارى
يمن حبك نهر بالروح جارى
وين الله وتصير بيوم جارى
احنى الباب والحايط سويه

حرف الهاء وسلامتك

[Broken oars]

هديه اهديلك الدلال ... قبله
يمن ما عشك كلبي بيوم .. قبله
لون بشفافي من شفاك ... قبله
روحي وكلبي انطيهم هديه

سلامي للجميع
حرف النون

[فاتن وهيب شاعرة المنتدى]

مساء الغلا وكل الهلا وحرف النون

نشدت الناس عنك وانت هينه
وعلى فركاك تلفنه وأنتهينه
الكلب أنت تعذبه وانت هينه
ويظل اسمك غالي عليه

مع تحياتي

حرف الكاف

[Broken oars]

مساء الورد على الطيبين ... فاتن كافي من حرف الكاف حبوبه شلعتي كلبي بيه

كافي من حروف النون والكاف
بمزاجي ما بقت اشعار والكاف
تره مسودن اصيرن بيك والكاف
ترضه الناس تتفرج عليه؟

تحياتي .. وعلى كولتك عليهم

حرف الواو

[فاتن وهيب شاعرة المنتدى]

هههههههه مو بيدي احب هلحرفين وتدلل بعد مااكولهن

وحرف الواو اكول

وحك صفين والخندق وحطين
لميش الراس بغيابك واحط طين
اطير من الفرح صدك واحطن
اذا بالحلم مرة تمر علية

وسلامتكم

حرف الياء

[Broken oars]

هههههههه تسلمين يالغاليه ... تره اني مو قوي بالابوذيه واول مره اكتبها من اجيت لمنتديات الفرات ولا اكتب ابوذيه من غيري والابوذيات الي اكتبها كلها تجي بوقتها لأن بصراحه ما احفظ يعني علكيفج وياي

وتدللين حرف الياء يجرالك

يرف رمشي عله طيفك من يمرنه
واطيع شينطق السانك من يمرنه
لون لا حتك جمره ...من يمرنه
تكب وتشتعل وتعم عليه

تحياتي الك يا غاليه ... طبعا اشاقه وياج اي حرف تحبيه هوه امر ويتنفذ

حرف الميم

[فاتن وهيب شاعرة المنتدى]

حياك وماشاء الله عليك مبدع ومقتدر وحرف الميم ارد عليك واكول

من شاف الحسن حسنك شهدلك
و دز غيمة نحل تمطر شهد لك
اهد روحي وبعد مدري شهدلك
اهد كلشي واجيك ازحف بديه


وحرف الف اريد منك ياابن البصرة الزهية

وسلامي لاهلها

[Broken oars]

سلامك وصل يا فاتن العزيزة ... ولك حرف الالف مع خالص امتناني

اخذ مني الف انطيك والاف
يخي مامش ولف وياي والاف
اهيم وي الوحش بجفاك والاف
طبع الصحرا من تبعد عليه

تحياتي وسلامي لك
حرف العين

[فاتن وهيب شاعرة المنتدى]

مساء الخير والعافية وسلامي للجميع
وتدلل يابروكان وحرف الياء

عالدار امر واشتم من عندة نسمه
وتطيب الروح بلسم من اسمه
اهيم آنه بحرف واحد من اسمه
ومن اسمع كل اسمه شلون بيه


وحرف الطاء

[Broken oars]

مساء الورد والرياحين عليكم
حرف الطاء لفاتن العزيزه

طريقك وي طريقي ما تراهم
ولون تمشي بدرب حبي ما تراهم
الوف من العواذل ما تراهم
وتراني انه الحبيب وتجفي بيه؟

حرف الكاف الك ما دام تحبيه
تحياتي

[فاتن وهيب شاعرة المنتدى]

مساء الليل الهادي على احبابي منورين

كثروني وزاد الكلب .........لو بات
ومدري انكطع حبل الوصل..لو بات
الكمر ولفي وعندي اليوم ....لو بات
مجنت ارعه الكمر لو زاد ضيه

حرف الغين

مع تحياتي

[Broken oars]

اجمل التحايا لكم احبابي

غليلي ما روه بعينك وحجباك
رغم كلبي سهر يمك وحجباك
لون بيدي استرنك وحجباك
عن كل الخلك وتضل اليه

تقبلوا خالص امنياتي

حرف الباء

[فاتن وهيب شاعرة المنتدى]

مساء الخير على الجميع

بديت أوماعرفت أمنين بدواي
عليل أوحارت العربان بدواي
إذا أنته طبيب اتعــرف بدواي
الحقني بالشفا قبــــــــل المنيه

وسلامتكم

حرف اللام

[Broken oars]

ليلة عيد ...ميلادك يراحاي
اصفكن حيل لفراحه يراحاي
انته الطيبت بالود يراحــــاي
اامر شنهو اوديلك هديـــــــه؟

كل عام وانتي بألف خير واعواما اخرى مليئة بالخير والعافيه والسرور
تحياتي القلبية لك هذا العام وكل عام

[فاتن وهيب شاعرة المنتدى]

مشكور ياغالي والله يديمك حضورك وردودك الرائعة والجميله

هي ارقى واروع هديه تحياتي القلبية مع حبي وتقديري

[فاتن وهيب شاعرة المنتدى]

مينه شبيه راكد وانت جاري
شيضر لو صرت جارك وانت جاري
اذا سعرك حكومي وان تجاري
اشتريك اشما يغلونك عليه

مع تحياتي يالغاليين عليه

وحرف التاء

[Broken oars]

تمر بالطيف اليه بحلم ... واعي
ونه المانام جفني عليك ... واعي
يمرضني السهر يهواي .. واعي
بس جلد وعظم يبقى انه بيـــــــه

تحياتي للغالين ... حرف النون

[فاتن وهيب شاعرة المنتدى]

مساء الليل الهادي وحبكم بالكلب باقي

وحرف النون

نبض كَلبي يصيحن حيل بس عود
بنحس عايش ولا فد يوم بسعود
ذبل وردي يناهي وباقي بس عود
بعد ما جان يزهي انكَطع ميّه

حرف الخاء

[فاتن وهيب شاعرة المنتدى]

مساء الخير يالغاليين اشو غايبين ماكو ردود

شنو صابكم جفاف حرف الخاء نكول

خلبص والعب بكيفك وشربك
وبان الغيض بعيونك وشربيك
أجرعك لوچنت حنظل واشربك
وأحبك لو چنت چتال اليه

وسلامتكم
حرف حرف الزاء

[Broken oars]

مراحب للجميع

زعلكم عاف بالدلال ... غربه
وشمس حبكم جفت بسماي ... غربه
الف وسفه حجي العذال .... غربه
الف وسفه الحمامه تصير حيه

تحياتي لكم
حرف القاف

[فاتن وهيب شاعرة المنتدى]

مراحب وكل الهلا بيكم

حرف القاف

قلبي صوجه ياصاحب من ورا ايدة

صديقى وظل غدر ينبض وريدة
غدرني الجنت احبنه واريدة
ووفالي الجنت اظنه يخون بية

وسلامتكم

حرف ح

[ايليا الغانمي]

حبيبي امن العتب أرجوك بس بس
ومنو البذنك يبعد الروح بس بس
إذا عندك العشرة اتريد بس بس
تعال وتنتهي كل القضيه

حرف العين

[فاتن وهيب شاعرة المنتدى]

هلا وغلا ياايليا والله منور

عطشان وانه بوســــط بيران
وحق الرضا المـــدفون بأيران
أريد أحفر بوسط الكلب بيران
ما عوفك مــــدام النفس بية

حرف الواو

وسلامتكم يالغاليين عليه

[اسماء علي]

وحق الله اكومن اجلالا لحسنك وقف لك
واسجل الكلب ياخلي وقف لك
واحطك بيه وقفلنه وقفلك
واطب بصدري واقفلكم عليه
:66 (46)::66 (46)::66 (46)::66 (46):

كلمن يحب ان تتواصل معنا مشرفتنا الغالية
علينا كلنا يسجل ابوذية هنا في موضوعها
مطاردة شعرية بالابوذية واتمنى من الجميع
المشاركة مع تحياتي وحبي لكم

اسماء علي من المعجبين بالمتالقة
( فاتن وهيب )

[فاتن وهيب شاعرة المنتدى]

http://files2.fatakat.com/2010/11/12893961521410.gif

[Broken oars]

لأني كنت غائب لفترة طويلة (ومحد ذكرني طبعا) ولا اعلم لماذا هذا الزعل ومنو مزعل عزيزتنا واختنا فاتن
ولأن الاخت اسماء علي لم تذكر الحرف المطلوب فأني سوف اعتمد حرف الواو من الاخت فاتن ... واهديها هذه
الابوذية مع التقدير والاحترام.

وعد مني عليك ذنوب ماعـــــاد
ولا كولن حبيبي الراح ماعــــاد
انا خلافك عليه العيـــد ماعــــاد
ولا فرحة التدك بابي عليـــــــــه

حرف الجيم للي بعدي
تحياتي