فاتت وحدة منيمي تطر الكاع
فهيت وكمت اصيح شبيج يبنية
بقيت امشي وراهة وخفت يا هالناس
خاف تصيحلي الشرطة المحلية
دخلت اول فرع يربطني وي السوك
وكمت افتر ودور هاي مو هية
عبر نص الوكت والعصر طر وفات
وانة جسمي تعب كل حيل مابية
واخيراً شا هدته اتعامل العطار
كلت فرصة اجتني وبعد ها هية
رحت يم المحل صفيت يمهة بساع
سلمت شكثر ماردت علية
خذت يمكن بخور وطول مال قماش
ونة واكف كمت افرك بأيدية
دعيت الله يخلص صفقة العطار
حتة اسألة هم مخطوبة يبنية
ماخابت ضنوني وخلصت مسواك
راحت تمشي بوية تكول حورية
رحت امشي وراهة وايد تشبج ايد
حلفت الة اكضي وياهة المسية
دارتلي وجهة وحركت لشفاف
وكالتلي دوخر الزكت بيه
صحت بوية يبوية منين هذا الصاح
احجي وياي خايب ما الك نية
شفتهة دنكت لملمت كوم احجار
وبوجهي تطش جن واهلية
وشفت كومة زلم تتسابق الشبخات
متجهين لينة ارفعت ايدية
وبعد توني كلت مو اني يا هالناس
واحد ركض رأساً ضرب رجلية
طحت فوك الارض والرشك مدري منين
مو اربع زلم يمكن ثمنمية
طبك ظهري وية جتفي وشككو لهدوم
وصابتني بأثرهة سكتة قلبية

بقلمي /

تحياتي لمروركم العطر ايها الاعزاء