السلام عليكم ورحمه الله وبركاته


سويت البارحه كبه تمن او رز او كبه حلب مثل ما يسموها اكثر الدول العربيه
لكن عدنا بالعراق معروفه بكبه التمن
وكل بيت تختلف مقاديره ومكوناته عن الثاني

لما تدورون بكتاب الطبخ العراقي راح تلقون انها تتكون من الرز والكركم وبعض البهارات الخاصه بالكبه

لكن اني معتمده هل طريقه من كم سنه
لان مره كان عندي رز الكبه قليل ( المكسر ) قلت ازيدها شويه عدس وطلعت كلش حلوه وعجبتنا بعدها استمريت على نفس الطريقه




المهم

مقادير العجينه
كوب عدس
كوب شعريه
كوبين رز مكسر
كوبين بتيته ( بطاطه ) مقشره ومغسوله ومقطعه قطع صغيره
صبغه زعفران او كركم
كمون
ملح
3 فصوص ثوم مدقوقين بالهاون ناعم
رشه هيل مطحون ناعم



مقادير الحشوه
لحم مفروم
بصل مقطع صغير
4 فصوص ثوم مدقوق ناعم بالهاون
رشه كمون
رشه ملح
بهارات كبه
كاري
كرفس
بقدونس









تطبخين مقادير العجينه كلها مع بعض بعد غسل الرز طبعا
تحطينهم بقدر على النار وتغطيهم بالماء يعني يكون فوق المكونات بــ 2 ونص سنتمتر
وتطبخيهم كانج تطبخين رز عادي يعني لما ينشف الماء تخليهم يهدرون ربع ساعه على نار واطيه

بعدها تقلبين القدر بصينيه كبيره وتفردين الخليط حتى يبرد
بعدها تفرميه مره واحده بفرامه اللحم الكهربائيه

ويطلع بهل شكل



هذي صوره ثانيه




الحشوه تطبخيها كالمعتاد
لكن كلما زدتي الكرفس واليقدونس ( المعدنوس) صارت اطيب

وهذا شكل الحشوه






تاخذين من العجين قطعه على حجم الجوزه وتفتحيها حسب الطريقه المعتاده عليها وتحشيها وترصيها بصينيه
لكن كلما سويتي القشر خفيف والحشو كثير كانت اطيب
يعني العجين يكون بس قشر يمسك الحشوه

هذا الشكل الي معتاده عليه لما اسوي كبه










خلصت العجين




بعدها تغلفيها بكيس نايلون او قطعه نايلون بس الوجه يحفظها من الثلج
وتحطيهم بالمجمده لثاني يوم
يعني لما يجمدون زين

وثاني يوم فكيها من الكيس والصينيه وحطيهم بكيس عادي وخزنيهم بالمجمده لوقت الاستعمال

لما تحبين تقليهم طلعيهم قبل ساعه من المجمده


وهذه قليت كبتين عشان تشوفون لونهم









ان شاء الله تعجبكم



صحتين