جنت افرح إذا شفتك وطش ضحكاتي بثوابي
وجنت بس أنجرح أشفى إذا مس ظلك صوابي
جنت عيدي وجنت جنتي وجنت خيرة أحبابي
وجنت ما أخشى كل واحد أسد بس انكسر نابي
وعليك الناس تسألني شكلهم حملي جذابي
أذا سيفي أنعوج بيدي ازامط بيش بكرابي
وأنا الموطبعي أتنازل ثبت لو دار دولابي
وإذا هبت علي الريح ما سد باب محرابي
بالله الريح ماوكفت أظل كاعد وسد باب محرابي
وعلى موده فتحت الباب وجاني يكود برياحي
نسه أجناحي شكثر غطاه رجعلي وكسر جناحي
ودفعني أبركة التمساح بس أنا اطلعت صاحي
اثاري البركة للتمساح والتمساح تمساحي
*****************
شتراوالك غشيم أنا وأنت أتصير خداعي
أنا بعز الوسن واعي وأنا الشابر شبر كاعي
وأنا المكشوف تباعي وأنا ألما أشوف إلك داعي
وظفر لو راد يخدعني اكص جفي وذراعي
*****************
وكلشي ما إلك عندي أخذت احزاني وافراحي
وحتى جروحك البيه شلعتهن أمس برماحي
وخاف بيوم أبجيلك وطك راحي على راحي
قفلت العين ع الدمعة وبلعته وراح مفتاحي
بعد بيمن تخوفني تعال وصير ذباحي
وخاف سلاح ماعندك تعال اذبحني بسلاحي
ولا اركع لجل جيتك وصف تمري يفلاحي
****************
تعال وطبر بجذعي أنا المحد ثنى إركابي
نخلة ولو طحت هيبة وإذا أطيح اطيحن عكس حطابي
سفينة وشلتك شمالك لا تدبج على خشابي
علي بهداي مو أغرك وإذا أغرك أغرك وياي ركابي
شرب من بيري وتعافه ودفتي وراح شرابي
وعطش وحتار شيسوي غصب رد يحفر ترابي
تريد الماي طميته فلا تحفر وشل مابي
دخيلك جوز عن حالي عليش توتر اعصابي
إذا اركع لجل جيتك شكل لعداي وصحابي
******************
وانا اكبر هرم ع الكاع ضوة التاريخ مصباحي
ولا محتاج جياتك تجي من الصين سواحي
على اصفاحي أنتجت أجيال تريد تهدم اصفاحي
صدك ثاريك مو صاحي
يحبة حنطة لترفسين شتكسرين من راحي
******************
بعد حطيتك براسي وعليك أتوحشت سباعي
وبعد ما تكدر إقناعي أنا الما ابدل طباعي
وانا الما عاش جراعي انا الصاعات أرد صاعي
وعداوتنه فلاتخلص عداوة ذيب وي راعي
تحياتي للجميع

احلام
دائما تختارين المميز والجميل
تحيه لك ومن خلالك لهذا
الصوت البصري المبدع
نائل
تحياتي

شتراوالك غشيم أنا وأنت أتصير خداعي
أنا بعز الوسن واعي وأنا الشابر شبر كاعي
وأنا المكشوف تباعي وأنا ألما أشوف إلك داعي
وظفر لو راد يخدعني اكص جفي وذراعي



والله وعاشت ايدك ودمت للشعر الشعبي

شتراوالك غشيم أنا وأنت أتصير خداعي
أنا بعز الوسن واعي وأنا الشابر شبر كاعي
وأنا المكشوف تباعي وأنا ألما أشوف إلك داعي
وظفر لو راد يخدعني اكص جفي وذراعي
احسنت عزيزتي اختيار رائع
شكرا لك وللمبدع نائل المظفر
ودام لنا ها الذوق الراقي
تحياتي وودي -- احلام

شكرا لمروركم المتألق , وبصمتكم الفنية هنا
لكم من اجمل التحايا المعطره باجمل الورود
دمتم بالف خير