يبو عيون الخضر يلشعرك أشگر حيل
خذت من لون رمشك لونها الحنطة
ملامح وجنتك چن رسم مرسومات
وتفاصيلك دقيقة وماشفت غلطة
تدري منين تاخذ خبطة هاي الناس؟
من أورود خدك تاخذ الخبطة
لمن جيت تمشي إنت ودخلت السوگـ
الخلگـ شبت عليك وصارت الورطة
والشرطة أجت تحجز بديها الناس
ومن شافوك تمشي بمشيت البطة
كل الشرطة أجو تايحظنونك حيل
وعليك الناس گامت تحجز الشرطة
صعدت الضغط عند الخلگ يازين
والدكتور شافك وارتفع ضغطه
وبگلب الطوارئ غفل من طبيت
أشو گلب الطوارئ صار بي جلطة!
شرط كاظم الساهر عل تحبه هواي
ومن شافك تراجع وإنتحر شرطه
وبنت وهبي وحسنها وكل الكلاوات
تتمنى تصير برگبتك ربطة
...
مر ماينجرع زيتون باقي الناس
ليش إنت عسل متروس زيتونك؟
وإذا خصرك شبر ومتونك أولايات
گلي شلون خصرك شايل متونك؟
عاين علخلگ ياشجرة التفاح
كلها تريد تعرف طعمك ولونك
يذبولك غزل كلها أتحرش بيك
وياريت البشر بس همه يردونك
شجر طير وجماد يغازلونك دوم
حتى بهالغزل بلكت يضحكونك
موغاية علاقة الغاية تعرف وين؟
لجل بس تبتسم وتطلع سنونك
آنه بهاي عيني لمحت كوم أتراب
صار إلسان عنده وگلك شلونك
ماشايف جسم معجب ابنفسه هواي
بس جسمك يل أبيض صار مجنونك
گلبك حتى گلبك هذا ابوالحصنين
نبض چي حويته ويگف من دونك
ولإن جفنك عبارة عن گشر بلوط
اليشوفك يريد أيچرز جفونك
ومن گد ماهي خضرة عيونك الحلوات
أحس غابة نخل مزروعة بعيونك
ومو طمع بنفطنا جو الأمريكان
سمعو بيك حلو وجوي يشوفونك
العراقي


تحياتي

يبو عيون الخضر يلشعرك أشگر حيل
خذت من لون رمشك لونها الحنطة
ملامح وجنتك چن رسم مرسومات
وتفاصيلك دقيقة وماشفت غلطة
تدري منين تاخذ خبطة هاي الناس؟
من أورود خدك تاخذ الخبطة

وصف رائع للحبيبه ابدعت وعاشت ايدك اخي الزير
لك كل الود