مو سكـِّير آني اولا جنت خمـَّـــــــــار *** بس من بوسه آنه ادمنت خمرتهـــــه
أسكر من حجيهه واخدر بلحظــــــات *** إذا عضة غنج عضتهه شفتهــــــــــه
محتار بطعمهن عسل لو رمـــــــــان *** من يغفه الرضاب بحضن بوستهـــــه
تغفه اعليهه شفتي وما تريد افـــراش *** لأن شفه فرشهه وشفه غطوتهـــــــــه
واصعد يم جفنهه وهم أرد سكــــران *** لأن يسحر جفنهه ابلون كحلتهـــــــــه
وتتمايل غنج ديرة سواد العيــــــــــن *** لو رادت تصد اعليه نظرتهـــــــــــــه
هنياله الجفن والكحله والرمشيـــــــن *** لأن وردات صارن وبحديقتهـــــــــــه
تظللهن حواجب أحله من سيفيـــــــن *** وبسحر الرمش ثبتت حلاوتهـــــــــــه
واحلى امن الحلا وبروعة الفردوس *** لو نثرت وردهه بليل كذلتهــــــــــــــه
أظل أنخاه شعرهه بلوعة الملهــوف *** واطلب خصله أصيرن من كصيبتهــه
أوصل للخصر والتف على الزنديـن *** وبحجة أطير ألزم إديتهـــــــــــــــــــه
واختل يم صدرهه واحضن النهديـن *** وبلهفة عشك أشتمهه ركبتهــــــــــــــه
واشتم من وردهه بغفلة الحســــــــاد *** وردة جوري خدهه بلون شفتهـــــــــه
حنطية وجه ومدوره الخديــــــــــــن *** والشايفهه أبد ما ينسه صورتهـــــــــه
تضحك للهوا وتطير ويه الطيــــــب *** ومن كل المعاني الحلوه جمعتهــــــــه
طول ورهدنه والجسم والله افصــال *** وامفصل عليهه حته مشيتهــــــــــــــه
تسحر بالنظر ويهيم بيهه الكـــــــون *** وآني ابلا نظر بس روحي عشكتهـــه
عشكت روحهه وعرفت محنتهــــــه *** لو بالدنيه أطشهه الدنيه كفتهــــــــــــه
لأن هيه الحنان وهيه روح الـــروح *** وهيه ابلا نقاش الروحي سلوتهــــــــه



وتقبلو تحياتي وهاي اول مشاركة
واريد ردودكم


كرار الرسام