الى أمـــــــــــــي



بعدچ ألدنيه حزن ودموع موت

وياحنانچ أحله من الســـــلسبيل

يمه حبچ صوت ناي وأحله صوت

ودون حبچ أبقه مــــذلول وعليل

لو أزعلچ والله اصير بحلگ حوت

وتــــــنگلب دنياي آهات وعويل

أنتي لو تدعين النــه بالقنـــوت

چان سجيل مطَرت من غير فيل

@@@@@@@@@@@

الغريب عيونه تبقه دوم مشبوحه ألبلاده

والمسافر همه يوصل حتى يغفه عالوساده

والي عنده حاجه يطلب حتمن يحصل مراده

واني عندي شوفة أمي صفت عاده وأحله عاده

@@@@@@@@@@@@@

ترفع أيدك من تسلم عالبشر

وعالحبيب أتسلم بطارف العين

تنرسم أخلاقك الحلوه صور

ويغدي عطرك مثل عطر الياسمين

وأمك ألطيبه تحضنك بالنظر

وتطبع أشفاف ألمحبه عالجبين

والتحبه الناس دلالــــــه أعتمر

من رضاء الله ورضاء الوالدين