يامن قدمتلك عمر حفنه اسنين

وشلت كَلبي بديه وليك وديته

انحفر رسمك ابعيني ابكل وكت موجود

واسمك عالرموش ابشوكَـ خطيته

وعلى باب الكلب مزروعلك قداح

يذوب امن العطش لو يوم ماجيته

مشرع باب كَلبي وبس الك مفتوح

ما اذكر دقيقة الباب سديته

شنهي انه الجنيته وليش هيج وياي

رمحك بالضهر يا ترف شكيته

مو انه الجنتلك خيمه وبتموز

تنام ابسد خيالي وخوش جازيته

اجاك الكَلب صافي وراد منك شوكَـ

تترسه ارماح اليه ابليل وديته

كل هذا وكَلتلك فدوه كلشي ايهون

وجرح كَلبي الجرحته ابصبر شديته

عسى يرجع كَلت وايجبر المكسور

وجبت زرع الامل بالروح شتليته

طريقك نار كبره وجمر يوكَد نار

وانه حافي الجدم عالدرب مشيته

منه خيمه جنتلك عن هوى الشمات

وشلت شريان كَلبي وحبل سويته

واشوف اكَبال عيني من اجو عذال

مدري اشبسبسالك وانته سليته

سيفك وانته اجيت ابكل صلافة عين

على شريان كَلبي الحبل كَصيته

شسويلك بعد والكَلب تك شريان

والثاني اعلى مود الغير شليته

حسافه وياك ضاعت كل دقيقه وميل

وكل نسمة هوه الوياك شميته

حسافه وجم حسافه العمر ضاع وياك

وحسافه العمر يمك ندمه طشيته

لمساتك بديه وهمستك بشفاي

وثغر الباوساك اشبيك عاديته

ادعي ابكل مغيب الشمس كل مصباح

على كلمن عليه ابشوكَـ عليته

الاهي ابرزقه كون ابكل عزيز اعليه

والاحسن الاهي اتشيل عافيته

الشاعر علي الكركوشي..قصيده جميله موشاه
بخيال واريحيه راقيه تقبل مروري

مروركم يزيد كلماتي البسيطة رونقاً
ايها المبدعين

حسافه وجم حسافه العمر ضاع وياك

وحسافه العمر يمك ندمه طشيته

لمساتك بديه وهمستك بشفاي

وثغر الباوساك اشبيك عاديته

كلمات رائعة كروعتك تحياتي لك ولهذه المشاعر الجياشة تقبل مروري مع كل الود ياشاعرنا المبدع

مرورك الكريم يزيد حروفي رونقاً
ايتها المبدعه

شكراً اختي الفاضلة لوقوفك امام حروفي البسيطة