اتصالح ويامن آنه مازعلان...
ولا زعلت واحد خاطر اتصالح

چـف وي غير چـف يصافحن معقول..
بس چـف ويه چـفه شلون يتصافح

أخوي اشلون ابيعه الجبت عمري وياه..
اذا امسي بوجنته بگصته اتصابح

موشيمة الشيعه الغدر وكت العوز..
ولا شمية السنه اطباع المگابح

هضيمه وعيب نشتل للغريب ورود..
وحنه عيال بيت انگوم نذابح

لاتطفي الشمع بالشمع ليل ينور..
وفك باب الفجر هالبينت غبشه

وداويلي الجرح ياجرح وحده يطيب..
اذا موفوگ جرحه البلسم ترشه

ولا تبني قصر طبع الرمل غدار..
بس تهد عليه العاصفه تفلشه

لم كل السنين الطرزتهه عتاب..
وفرهد شوگ عمري وبعثره وطشه

بس خلي الورد فوگ الغصن يرتاح..
وينام الحمام امئمن بعشه

خل نزرع ورد ونفرح البستان..
اذا مابيه جوري يغندب الممشه

خل نشتل عشگ ونقايض الفلاح..
اذا حمل عشگ مانقبل يحشه

مشاحيف الچـبايش شيعت عثمان..
وعلى متون الصرايف حملت نعشه

أنه ابن الناصريه وآنه ابن تكريت..
آنه ابن العراق العالگمر عرشه

انه مطلع الشمس فانوس للعميان..
وأنه زرياب صوتي اليطرب الطرشه

شأتم ام أبيتم احنه شمس الكون..
وشمس الله الجبيره بگاعنه مفرشه

ماشايل زعل بس العتب مطلوب..
هم شايف جفن زعلان وي رمشه

مطلوب الفرح لن الوطن مجروح..
حط ايدك بديه وخل نشد جرحه

خل ننسه الحزن ونجيب حنه وياس..
وبعيون الزغار نوزع الفرحه

خل نگعد سوه وناكل فرد ماعون..
ونعمر الوطن والخاين انفضحه.

من مهرجان المصالحه الوطنيه.

في مدينة السماوه.

2008

عدي فريد.

الله عليك وعالنص الراقي حبيب گلبي عدي

أبداع فعلا يفيض عذوبه وحب وشاعريه

اتمنى لك التوفيق وتقبل أحلى تحياتي 0

الله عليك كلمات رائعه
ومطرزة بحروف ذهبيه
دمت بهذا الابداع
لك خالص تحياتي أخي
تقبل مروري المتواضع

حجيك ذهب ياذهب كلمات في قمة الروعة

مو جديدة عليك ياابن العراق الغار تحياتي

لك يا راقي

..
لله درك سيدي الغالي
ما انقى وصفك
وما اجمل ماخرج من جعاب ذاتك
عطاء مثمر من العشق السرمدي للوطن
والروح الوطنيه الاصيله
حروف تجبرنا على الانحناء لها بكل مافينا
نزفت هطول لايزول
وزخات تحي كل مامات من الجسد
انعشت فينا الاحساس بحب الوطن والغيره والتآخي

اشدوا مسامعنا بالمزيد
ولاتحرمنا من هذا الجمال
ابدع.. وتألق..وزد
فكلنا مازلنا بحاجه للمزيد
لاعدمناك
لك اروع الياسمينات اخي الغالي
وتستحق التثبيت لروعتها

الاخ الرائع ..
الشاعر الرائع..يونس الجبوري شكرا لك

وهذا شرف لي ياغالي....

عدي فريد..دم لأخيك.