جاينه تدور عداله؟
ياعداله ؟
ويا بواچي ويانبض حاتم شتحچي
وحالتك ياهيه حاله
احنا ردينا ترى لعصر الجهاله
انت ما تدري السما ضايع هلاله ؟
وانت ما تدري المواگد انچفت فيها دلاله
وانت ما تدري العرب ذبحت بأيده عياله
ما رحلنا ,, ولا هربنا ,,
بهالوطن يالغالي كلنا
شفنا جيفات البعض شفنا العماله
وچنا كلنا نگول :
الرجال ترد نساء؟ استحاله
الرگص وسط الدماء؟ استحاله
ان يموت الكبرياء ؟ استحاله
لا تتيه
لا تتيه ولا تظل مخنوگ ذايب
ولا تهاب من الطلايب
انت شايب وانا شايب
ما عمر شفت الثعالب تاكل بلحم الغزاله ؟
ما عمر شفت الصقور تنشرى بأيدي النذاله ؟
ما عمر شفت الاسود رابضه وصارت كسالى ؟
اي وحگ رب الجلاله
ما يخلّص هالوطن الماعرف هذي يمينه من شماله
واي وحگ رب الجلاله
شما كتبت اليوم يا حاتم دلاله
على ان الغافي لا يمكن سؤاله
وجرحك النازف يغالي من الاصاله
والجرح للرجال قد يبرز جماله
فصفار البيضه يحميها زلاله
وزوال القشره لا يعطي استطاله
وشحيح النفس لا تتبع ظلاله
ونشتكي لله من جور العداله
ايه يحاتم
نشتكي لله من ظلم العداله




الكناري
يونس الجبوري
19/1/2011


تنويه:
القصيده ارتجلتها رد على قصيده بعنوان مو عداله ,,في الليلة الماضيه
لا احد ياخذ بخاطره في الفرات رجاءا الشغله في مكان اخر

وهذه هي قصيدة صديقي الاخ الشاعر حاتم الهاشمي التي رددت عليها اتيت بها من باب التطمين للفراتيين جميعا



مو عدالة.....
اسنيني ضاعن بالبواچي
وروحي بالحسرات تنبض
موعدالة
ولاهي حالة
گلبي صار سنين تايه
وبسببكم حالي حالة
تايه وينشد عليكم
يسأل ومامل سؤاله
امسودن وسالفته بيكم
وينسى سالفته المسودن...؟؟؟؟
استحالة
وين صرتو .....وين رحتو .... وين شلتو؟؟
جنوب عن حينا رحلتم لو شماله
انطوني فد نقطة دلاله
بيا درب امشي وراكم
ويا شهر انطر تجوني
غيابكم طول عليه
وعيدكم ما هل هلاله
وعمري فات وبعد
مايرجع محالة
وراح من عندي يوسفة
اوودع سنينة بجهاله
وجرحي صار رماد
ماينفع دواله
دلوني امشي بيا درب
امشي شرق؟؟؟
امشي غرب؟؟
دربي عثر كلش صعب
مخنوگ.... ذايب.... كلي حب
مخنوگ وبحاجة هوى
اظلم طريقي ابلا ضوة
بس آنه وجروحي سوه
تنزف ومامش كل دوه
دلوني امشي بيادرب
دلوني مو گلبي تعب
حيلي انّهب
جرحي نزف لمن نشف
خلص دمايه وما وگف
لمن يبس مثل الحطب
ومن كثر حرّ أل بالگلب
شب واشتعل وماظل أمل
وج بلهب
والحرگ واصل للعصب
خزن امن جديد التهب
وبجفوني ماظل كل دمع
مثل الشمع جف النبع
جفني تطوّه
من التعب صاير بشع
وليش الجفه..... بيكم طبع
لاياربع اني ابختكم ياربع
مابيكم مروه و رجا
منتم عرب؟؟؟
ماعدكم انصاف شعجب
تعوفوني هيچ بلا ذنب
ذكرولي وانطوني سبب
خلوني بلخوف انتحر.... خلوني عالهّم انتصر
واعلن حرب
كلش صعب
ابقى انتظر
ماظل صبر
لاظل عمر
يسوه التعب


بقلمي
الشاعر حاتم الهاشمي