اشلون عدهه عيون حلوه والرمش حارس امين
والحواجب كوز يرمي نبال تكتل بالكلب يترك انين
والوجه نور يتلألأ يعجز الرسام مترسمه الايدين
بيه مسحة حزن واضح مدري اعليمن حزين
++++++++++++++++++++++++++
كلت خلي اتجراً انه بلجي اعرف سر حزنهه
خلي اتقرب عليهه واسمع احجايات منهه
اتقربت تاخذني خطوه اتردني خطوه اشلون ابدي انه وشكلهه
اشلون شرد احجي وياهه وهي شنهو ايكون ردهه
سلمت بس باوعتلي وماحجت غمضت جفنهه
+++++++++++++++++++++++++++++++
اتجرأت كلتلهه اشوف ادموع بعيونج واشوفنج حزينه
ياهو هذا القاسي كلبه الباك منج فرح عمرج ياحنينه
كالت الايام يبن الناس هل جارت علينه
وحطمت كلشي بحياتي وضيعت عمري وسنينه
وحركت اخدودي دمعتي وكلبي معصور باًنينه
++++++++++++++++++++++++++
روح تتعب لواسولفلك اشبيه وينعصر كلبك بهمي
ومن فضولي اتبسمرت ماودي امشي وكلت احجي
كالت احجيلك اشبيه وليش تذرف عيني دمعي
وليش دوم الحزن ميفارك عيوني وحاظر وخطار يمي
كلت احجي انه شاعر خل اخط همج بقلمي
كالت احنه اثنين جنه نحب بعضنه وجان محبوبي ابن عمي
من الصغر جنه سويه نروح نقره ابيت عمي
++++++++++++++++++++++++++++++++
هو يرسمني بكتابه وانا ارسمنه بكتابي
ولو تاخر عني جني مفاركه ناسي واحبابي
ومن يجي كلبي يحسه كبل ميدك بيده بابي
ولوزعلت اعليه ابجي ومن يجي انسه عتابي
وقررينه احنه الزواج وانكتب عليه كتابي
وحضرت ثوب الزفاف وجان ابيض لونه صافي
واتفقنه على الخميس ايصير اجمل يوم دافي
واحلمت جن ولفي اجاني يركض وتعبان حافي
وكلت ياربي دخيلك مالي حيل الحزن كافي
وصارت بكلبي انا خوفه ايصير بيه الجان خافي
++++++++++++++++++++++++++++++++
ومن اجه يوم الخميس اشكد خفت
خاف ينباك الفرح مني واضيع
واكتمت بكليبي خوفي وصار كلبي اشكد وسيع
وحضرت امي وكل خواتي +ايحضرني ليومي الحلو البديع
وصارت الساعه بالخمسه وجاني خلي اشكد انيق
باسني بكصتي وكلي كومي يااجمل ربيع
وكمت امشي وايدي بيده وخايفه من ايده اضيع
وابد مافكرت مره هو من ايدي يضيع
وابد مافكرت مره احزام كافر يذبح الضحكات باشفاف الرضيع
وفعلأ اول ماوصلنه لبيتنه
الحاقد اجانه وفجر بنصنه احزامه ودمرانه
وانكلب ثوبي الابيض صار احمر من دمانه
وضاع من ايدي حبيبي وغيمت وياه سمانه
هذا سر الحزن يل تسال اشبيه وليش دوم انا حزنانه


هذه الكامات مهداة لكل من فقد حبيب او عزيز اوصديق والى عروس حي اور التي حطم الارهاب قلبها


اخوكم الشاعر
صالح قاسم