آنــــــــه شـــــــــــــــروگــــي

يِعَّيِرْني ويگلي إجنوبي وأهلي شروگ آنه أشكر شعورك جدا ً وتسلَّم

تعيرني لأني شروگي وآبن الچا چا گلي إعله أصلك منو وأهلك هَم

مِسْعَد بيتي علشط وأغرف االطيبات من نِعِم الخوال ونِعِم شجرة عَم

أنه شروگي نعم وآنه أصلي دهلة هور سوَّيت الحياة البيها تتنعَّم

وأنه شروگي الخلق من التراب أقلام وسوالك مدارس بيها تتعلم

وأنه شروگي الخلق أبجديات الكون وسوالك لغه وخلاك تتكلم

وأنه شروگي الكتب أول عدل دستور وخله الكون من هلنور يتعلم

وأنه شروگي الأصل سبحه إتعرفني الناس من مِيَّة ظهر واصل مصلصل دم

آنه أصلي الجزيره ونسلي من قحطان وإسماعيل جدي الآمن وأسلم

آنه أصلي النـبع وأهلي أهل طيبات والعوجه أبد وياي ما ترهم

أنه شروگي عفيف وما يطخ الراس ويتلوگ لهذا وذاك يتلگم

أنه شروگي نچر يصطاد ما ينصاد يوگع علمنايا بغيرته إمحَّزم

أنه شروگي نعم مفخره ورفعة راس مو سُبه ونقيصه وباب حقد وذم

جهل بيك وتكلي شروگ أهل جاموس ما تفهم أبد معناهه ما تفهم

أنه شروگي نعم شامخ جبل ما طاح وإنت شما طلت وياي تتقزم

أنه شروگي طبيب وشاعر وفنان ودكتوراه أخذها وبعده يتقدم

بس إنت منو وأهلك بيا ميزان أعرف قدر نفسك حتى تتكلم

آنه أهلي الذهب صافي الذهب تيزاب وإنت أصلك وضيع ودوني ومجرذم

لو مآني عراقك مو عراق وچان بيتك فوگ راسك طاح وتهدَّم

ولولاي الوطن بيد الصواجر صار (ومود) الفوگ راسك چان يتحكم

بس جدي الشروگي بثورة العشرين عِد عيناك صاح ويا وطن تسلم

ما خاف العدا طاح وعگل رجليه وخله الطوب وجهه إمعزه ومصَّخم

أنه شروگي أصيل بيوم صاح الصاح شد روحه إعله روحه وثار يجلي الهم

من نادى الوطن طاح إلها رُكبه ونص ما همَّه العُمر بس الوطن يسلم

طينتنا الكرامة وعهد عدنا الروح لعيون الوطن نفديها ما نندم

ولو مايك يشح، وردت تنخى الله بتراب الكرامة البينا تتيمم

وشروگي تگلي ! .. هايه أبد موعيب هاي أجمل وسام وبيها نتوسم

أنه شروگي ويظل لآخر نِفَس بالروح حُب هذا الوطن يجري إويه مجرى الدم


منقول من
د. علي عبد الحمزة

يسرني ان اكون اول المارين
وشكرا لذائقتك الرقيقه

لك ولقلمك كل الحب يالغالي
جميل هذا الذوق

والنعم منك ومن اصلك الطيب
اخي جبروت
شكرا لهذا الأنتقاء الجميل
لك كل الود والتقدير

والنعم من كل عراقي شريف ويخسى شارب الفاين

والنعم من كل عراقي شريف ويخسى شارب الفاين