كتبت الشاعره الشطراويه
ادور اعليك مثل اللي يدور موتته اجماله
واكت اعليك دم ادموع ما ضل بالجفن لعزازي وشاله
حالي اعليك حال الكوسج البلماي ما يرضه المذله وغدرته الفاله
ومثل حال الدخيل وطاح خياله
ومثل مطلوب دمه وضاع جتاله
ومثل مصيوب محد كربه وشاله
حملك شالته الدنيه وانا لحملي صفيت اليوم انخاله
لا جار الفزعلي وعاوناني اعليه
ولا خوي النهض ابحملي وشاله
وين اطي الوجه لا وين يا هو اللي اوجي اعليه يوجي من الصبح بالباب شياله
ادريبك لحت عنكود وانه اعثوكي الحثاله
اوزنوك بعدد ليرات وتعبي اعليك محد وزنه وجاله
حلو يمضمر الهامات شلك بالرجيج الصافي اخشاله
اجيتك والجدم عناي يا جدم المشالك مثلي اعداله
مضيف الما يضيف الضيف جا شله بكهوته ونصبت ادلاله
بيادر حزني انه اعليك بنص الشطره تمثاله
نكتفي بهذا القدر من القصيده
---------------------------------------------------
فكان الجواب
تدور اعليه مثل اللي يدور موتته اجماله
وادور اعليك جالغركان ينتك للهوه ويريد منواله
وانه اللي الدمع نهران بالوجنات سواله
حالي اعليك ما ينكال بيه وحالتي حاله
مثل الطاح بالقفره وعطش ورمال فوك الراس هياله
ومثل اللي بناله مضيف من كصبات
وتالي ارماد صار بنار عذاله
ومثل اليسكي كاعه بدمعة اعيونه واجاه السيل بيه وعمله سواله
ومثل اليمشي بالبيده بتوالي الليل وذياب الدرب بالخطوه تبراله
ومثل الطفل من يركض ومرعوب ونار التاكل اذياله
حالي اعليك حال الببره نص الليل ينبش يطلع الشوكه من اصبعه بطفيه اللاله
حملي مكور ومطروح وانته تكول وكتك حمله وشاله
حملي عله الرصيف وصار نص ادغار والناكه هزيله وحالتي حاله
اتوكاه كوه عله الشماته بزود لو حدره اطيح وهاي الجماله
هذا طبعي وطبع كل رجال يتوكاه لاجن عيب ينخاله
انه اللي يمد ايده على العنكود والناطور صاح بزجر هد لاله
واكولن حامض العنكود خله يولي جيه ما ايدي تدناله
احسن من اعثوك الحملت حنضل واهيه بوزن هداله
واحسن من عرانيص العثك لو شاص وضل الجمري يبراله
حزني اعليك مشهد صار بالحبوبي تمثاله
نكتفي بهذا القدر
ارجو ان تنال رضاكم مع تحياتي

(بقلمي)

منقول
ارجو كتابة منقول للأمانة الأدبية ومنعا للحذف لاحقا

شكرا لك عزيزتي على هذا الأنتقاء الجميل
مساجله رائعه والجواب اجمل
تحياتي

مساجلة جميلة
واختيار مميز
كل الشكر لك عزيزي ولتذوقك
ودام لنا هذا العطاء والتواصل

مع تحياتي لك

جميل ماكتبت وسلمت يداك وسلم قلمك وتقبل مروري عزيزي

مساجلة رائعه عزيزتي وجواب اروع سلم قلمك ودام نبضك
تحياتي لك